Almatyda týrıserdiń jaılylyǵy men qaýipsizdigi úshin taý marshrýttarynyń atlasy men kartasy jaryq kórdi, dep habarlaıdy aqshamnews.kz
Almaty qalasynyń Týrızm basqarmasy men Almaty Tourism Bureau týrıser men qala turǵyndarynyń taýda qaýipsizdigin qamtamasyz etý maqsatynda aqparattyq materıaldar ázirledi: taý marshrýttarynyń atlasy, taý marshrýttarynyń kartasy jáne «Taý shyńdary men qaýipsizdik» atty broshúra.
- Taý marshrýttarynyń atlasynda aımaqtaǵy bes tanymal marshrýt týraly aqparat jınaqtalǵan. Atlasta tek marshrýttardyń sıpattamasy ǵana emes, sonymen qatar joryqqa daıyndyq boıynsha usynystar, qajetti qural-jabdyqtardyń bolýy, jergilikti jerlerde baǵdar alý boıynsha keńester jáne qaýipsizdik erejeleri berilgen. Bul atlas taý demalysyn unatatyndar úshin taptyrmas serik bolmaq.
- Taý marshrýttarynyń kartasy Kishi Almaty jáne Úlken Almaty shatqaldarynyń marshrýttaryn qamtıdy. Ol navıgasıany yńǵaıly etip, qajetti shartty belgilerdi kórsetken, bul týrıserge jergilikti jerde ońaı baǵyt alýǵa múmkindik beredi. Atalmysh karta Almatynyń tabıǵı sulýlyǵyn tereńirek zerttegisi keletin áýesqoıǵa da, tájirıbeli týrıserge de paıdaly bolady.
- «Taý shyńdary men qaýipsizdik» broshúrasy – taýda qaýipsiz áreket etýge arnalǵan praktıkalyq nusqaýlyq. Onda týrıser betpe-bet kelýi múmkin qaýip-qaterler qarastyrylǵan. Broshúra birkúndik jáne kópkúndik joryqtarǵa arnalǵan tizimdi qamtıdy, bul týrıserge kez kelgen saparǵa durys daıyndalýǵa kómektesedi.
Materıaldar Visit Almaty aqparattyq ortalyqtarynda jáne tómendegi silteme boıynsha úsh tilde tegin qoljetimdi: https://www.gov.kz/memleket/entities/almaty-tourism/documents/details/722138?lang=ru.