10-12 qazan aralyǵynda Almaty qalasynda jol-kólik oqıǵalarynyń, jolaýshylar tasymaly salasyndaǵy quqyq buzýshylyqtardyń jolyn kesý jáne olardyń aldyn alý maqsatynda "Tasymaldaýshy" jedel-profılaktıkalyq is-shara ótkiziledi, - dep habarlaıdy Aqshamnews.kz.
İs-sharanyń basty maqsaty – zańsyz tasymaldaýshylardy anyqtaý, joldardaǵy qaýipsizdik pen zańdylyqty qamtamasyz etý, sondaı-aq taksı men qalaaralyq tasymal qyzmetterin paıdalanatyn azamattardyń quqyqtaryn qorǵaý. Sharaǵa kólik prokýratýrasy, kólik baqylaý ınspeksıasy, memlekettik kirister organdary jáne "QazAvtoJol UK" AQ ókilderi tartylǵan. Birlesken mobıldi toptar qala kóshelerinde jáne qaladan shyǵaberisterde reıdtik is-sharalar ótkizip, avtokólikterdiń tehnıkalyq jaı-kúıin jáne ruqsat qujattarynyń bolýyn tekserýde.
- Negizgi nazar jolaýshylar tasymalyna aýdarylýda. Tehnıkalyq aqaýy bar nemese qaıta jabdyqtalǵan kólikterdiń paıdalanylýyna jol bermeý, sondaı-aq zańsyz tasymaldaýshylardy anyqtaý mańyzdy. Azamattardyń qaýipsizdigi men zańnyń saqtalýy – bizdiń basty basymdyǵymyz, – dedi Almaty qalasy PD jergilikti polısıa qyzmeti basqarmasy bastyǵynyń orynbasary Tımýr Noǵaıbaev.
Polısıa zańsyz tasymaldaýshylardyń qyzmetin paıdalanýdyń jol-kólik oqıǵalary qaýpin arttyratynyn jáne jolaýshylardyń ómiri men densaýlyǵyna qaýip tóndiretinin eske salady. "Tasymaldaýshy" jedel-profılaktıkalyq is-sharasy memleket Basshysy jarıalaǵan "Zań jáne tártip" qaǵıdatyn iske asyrý jáne "Profılaktıka jyly" aıasynda ótkizilip jatyr.