Almatyda qoǵamdyq kólikti damytý jónindegi jumys aıasynda avtobýstardy jańartý jalǵasýda, dep habarlaıdy almaty-akshamy.kz
Búginnen bastap №16 jáne №50 baǵyttar boıynsha avtobýstar jańaryp, jyljymaly birlikter sany artty.
- №16 baǵytta «Asyl arman» sh/a – OMjDS» baratyn avtobýstar sany 15-ten 25 birlikke deıin, al №50 baǵyttaǵy «Aısha bıbi sh/a - Baısultanov kóshesine» qatynaıtyn kólik sany 10-nan 25 birlikke deıin artty.
- Golden Dragon markaly 12 metrlik jańa avtobýstar zamanaýı quraldarmen jabdyqtalǵan, sonyń ishinde kondısıoner, beınebaqylaý júıeleri jáne telefondardy zarádtaýǵa arnalǵan USB qosqyshtary bar. Salon aǵymdaǵy jáne kelesi aıaldamalardy kórsetetin aqparattyq dıspleımen jabdyqtalǵan.
Bul rette bosatylǵan avtobýstar basqa baǵyttardy kúsheıtýge jáne saıabaqtyń rezervtik quramyna baǵyttalatyn bolady.
Eske salsaq, ótken jyly megapolıs basshysy Erbolat Dosaevtyń tapsyrmasy boıynsha ákimdik 600 avtobýs pen 100 troleıbýs satyp alyp, 22 jańa baǵytty, onyń ishinde qala mańynda 10 baǵyt uıymdastyryp, 50-ge jýyq eldi mekendi qamtydy. Bıyl taǵy 600 avtobýs, 100 troleıbýs jáne 100 elektroavtobýs satyp alý josparlanýda.