QR Sybaılas jemqorlyqqa qarsy is-qımyl Agenttiginiń Almaty qalasy boıynsha departamentiniń basshysy Arman Rahımov ÓKQ brıfıńinde megapolıste Sybaılas jemqorlyq táýekelderiniń kartasyn júzege asyrý barysy týraly habarlady.
Sybaılas jemqorlyq táýekelderiniń aldyn alý úshin kartada qurylys jáne turǵyn úı, ekologıa, jer, kásipkerlik, ekonomıka jáne qarjy, fıskaldyq, áleýmettik, ınfraqurylym jáne joldar, seısmıkalyq qaýipsizdik, jylý elektr stansıalary, problemalyq qurylys obektileri sıaqty 11 negizgi salalary anyqtaldy, dep habarlaıdy Almaty-akshamy.kz.
«Sybaılas jemqorlyq táýekelderiniń kartasyn iske asyrý barysynda osy jyldyń 1 toqsanynda seısmologıalyq qaýipsizdik salasynda sybaılas jemqorlyqqa qarsy monıtorıń, sondaı-aq densaýlyq saqtaý, sport jáne áleýmettik qamsyzdandyrý júıelerindegi sybaılas jemqorlyq táýekelderine syrtqy taldaý jumystary júrgizildi», - dedi A. Rahımov.
Kásipkerlik salasy memlekettik organnyń erekshe baqylaýynda. «Bızneske jol» jobasy aıasynda jyl basynan beri 4 kásipkerdiń túıtkildi máselesi sheshimin tapty.
Osylaısha, sybaılas jemqorlyqqa qarsy qyzmetke JSHS ókilderi medısınalyq buıymdardy satyp alý boıynsha ótkizilgen tenderdiń qorytyndysyna baılanysty shaǵymmen habarlasty. Memlekettik organnyń aralasýynan keıin jiberilgen buzýshylyqtar úshin uıymdastyrýshynyń laýazymdy tulǵasy tártiptik jaýapkershilikke tartylyp, shart buzylyp, bul lottar jańa tender ótkizý jolymen qaıta jarıalandy.
Taǵy bir jaǵdaıda salyq organy tarapynan kásipkerdiń quqyǵyn buzý faktileri joıyldy. Memlekettik kirister departamenti jeke kásipkerge salyq bereshegin óteý týraly sebepsiz habarlama berdi. Sondaı-aq, jeke kásipkerdiń belsendi kásipkerlik qyzmetiniń toqtaýyna ákelgen shyǵys operasıalaryn toqtatý týraly hattama shyǵardy. Osy fakti boıynsha tıisti sharalardy qoldaný nátıjesinde jeke kásipkerdiń barlyq banktik shottary buǵattan shyǵarylyp, negizsiz eseptelgen salyq bereshegi esepten shyǵaryldy.
Sonymen qatar, problemalyq qurylys obektileri salasynda búginde qalada tapsyrý merzimi buzylǵan jáne urlaýdyń yqtımal qaýpi bar 5 áleýmettik, sporttyq jáne komýnaldyq nysannyń qurylysy qadaǵalanýda. Ótken jyldyń qazan aıynan bastap bul uzaq merzimdi qurylys nysandary basqarma baqylaýyna alynǵan.
Fıskaldyq salada Almaty qalasy boıynsha Memlekettik kirister departamentiniń kedendik baqylaý basqarmasynyń eki laýazymdy tulǵasy áshkerelenip, olar QR ÁQBtK-niń 677-baby boıynsha (zańsyz materıaldyq syıaqy alý) ákimshilik jaýapkershilikke tartylyp, 3 mln teńge aıyppul salyndy.
Ekonomıka jáne qarjy salasynda «Satyp alýdyń biryńǵaı terezesi» portalynyń monıtorıńi turaqty negizde júzege asyrylady. Monıtorıń nátıjeleri boıynsha İ toqsanda 470 mıllıon teńgeden astam búdjet qarajatyn utymsyz paıdalanýdyń joly kesildi.
«Qazirgi ýaqytta Agenttik «Dárilik zattar men medısınalyq maqsattaǵy buıymdardy saraptaý ulttyq ortalyǵy» SHJQ RMK qyzmetindegi sybaılas jemqorlyq táýekelderine syrtqy taldaý júrgizýde. Onyń barysynda baǵany memlekettik retteý, dárilik zattar men medısınalyq maqsattaǵy buıymdardy tirkeý máseleleri, olardyń sapasyna, tıimdiligine jáne qaýipsizdigine qoıylatyn talaptardy saraptaý jáne t.b. saraptamalar júrgiziledi», - dedi A. Rahımov.
Sondaı-aq ol búkil respýblıka boıynsha áleýmettik qamsyzdandyrý salasynda keshendi taldaý júrgizilip jatqanyn atap ótti. Taldaý barysynda búdjetti josparlaý, jeke kómekshiler qyzmetin qarjylandyrý, ataýly áleýmettik kómekti tóleý, kásiptik oqytýǵa aqshany jumsaý, kásipkerlikti damytýǵa granttardy bólý, sondaı-aq eńbekaqy qoryn ıgerý máseleleri qarastyrylady.
Sóz sońynda, ÓKQ spıkeri memlekettik organdar men qoǵamnyń ýaqtyly jáne kelisilgen áreketteri arqyly ǵana sybaılas jemqorlyqqa tıimdi qarsy turýǵa bolatynyn atap ótti.