Qoǵamdyq densaýlyq saqtaý basqarmasynyń málimetinshe, Almatyda sút bezi obyry basqa onkologıalyq aýrýlardyń ishinde birinshi orynda tur, dep habarlaıdy Almaty-akshamy.kz.
"Almatyda 9 aıdyń qorytyndysy boıynsha onkologıalyq aýrýlar qurylymynda sút bezi obyry birinshi orynda – 589 (14,5%), toq ishek obyry ekinshi orynda – 358 (8,8%), ókpe obyry úshinshi orynda – 236 (5) .8%)", - delingen habarlamada.
Sút bezi qaterli isigimen 7640 áıel esepte tur. Almatyda jyl saıyn sút bezi qaterli isigimen 700-ge jýyq áıel aýyrady. Jyl basynan beri megapolıste 589 áıeldiń osy aýrýmen aýyratyny anyqtalsa, onyń 527-si aýrýdyń bastapqy kezeńinde.
"Sút bezi obyryn erte anyqtaǵanda (1 jáne 2 kezeńde) emdelý yqtımaly óte joǵary jáne 90%-dan astam jaǵdaıda emdeledi. 3 jáne 4 kezeńde emdeý múmkindigi aıtarlyqtaı tómendeıdi", - dedi Almaty onkologıalyq ortalyǵynyń dırektory Nursultan İzbaǵambetov.
Mammografıa skrınıngi nelikten mańyzdy?
Onkologtar sút bezi obyryn erte kezeńde anyqtaý úshin Qazaqstanda tolyǵymen tegin júrgiziletin skrınıngtik tekserýden ótýdi taǵy da eske salady.
Skrınıng 40-70 jas aralyǵyndaǵy áıelderge bekitilgen jerdegi emhanada júrgiziledi.
"Mammografıa skrınıngi qaterli isik aýrýyn erte kezeńde anyqtaýǵa kómektesedi. Sonyń arqasynda qaterli isikti áıeldiń ózi aýrýdyń belgilerin baıqamaı turyp-aq anyqtaýǵa bolady. Bul der kezinde jáne tıimdirek emdeý múmkindigin arttyrady, sonyń ishinde aǵzany saqtaý operasıalaryna múmkindik beredi. Qazir Almatyda "Qyzǵylt qazan" naýqany ótip jatyr. Bul – sút bezi qaterli isiginiń qaýip-qateri, osy aýrýdyń aldyn alý jáne erte dıagnostıkalaý týraly aqparattandyrýǵa baǵyttalǵan is-sharalar kesheni. İs-sharalar qalanyń barlyq emhanasynda jáne bizdiń Almaty onkologıalyq dıspanserinde ótip jatyr", - dedi dáriger.
Almaty onkologıalyq dıspanserinde 7 qazannan bastap, ár senbi saıyn (7, 14, 21, 28 qazan) sút bezi obyryn erte anyqtaýǵa arnalǵan Ashyq esik kúni ótip jatyr. Onda ár áıel mamannan keńes ala alady jáne tekserilý qajet bolsa, tegin tekserile alady.