Sotaldy tergeý Almaty qalasy boıynsha Ekonomıkalyq tergeý departamentine tapsyryldy.
Almaty prokýrorlary suıyltylǵan gaz satýmen aınalysatyn monopolıs kompanıaǵa qatysty sotaldy tergep-tekserýdi bastady, dep habarlaıdy Almaty-akshamy.kz vedomstvanyń baspasóz qyzmetine silteme jasap.
Almaty qalasynyń prokýratýrasy QR Básekelestikti qorǵaý jáne damytý agenttiginiń Almaty qalasy boıynsha departamentiniń mamandarymen birlesip, «Petrosun» JSHS qyzmetine tekserý júrgizdi.
«Kompanıanyń ońtústik óńirlerde naryqtaǵy úlesi - 76,9 paıyz. Byltyrǵy jyldyń qyrkúıek aıynan jeltoqsanǵa deıin «Petrosun» JSHS aımaqtaǵy qyzmetin asyra paıdalanyp, aı saıyn avtogaz baǵasyn barynsha joǵarylatqan. Nátıjesinde osy kezeńdegi ózindik quny bir tonna taýarǵa 323,8 paıyzǵa deıin ósti. Derek boıynsha prokýratýra Qazaqstan Respýblıkasy Qylmystyq kodeksiniń 221-babynyń 2-bóligi («Monopolıalyq qyzmetti teris paıdalaný») boıynsha qylmystyq is qozǵady», - delingen habarlamada.
Vedomstvo málimetinshe, sotaldy tergeý Almaty qalasy boıynsha Ekonomıkalyq tergeý departamentine tapsyryldy. Qazaqstan Respýblıkasy Qylmystyq-prosestik kodeksiniń 201-babyna sáıkes, ózge de málimetter qazirgi ýaqytta jarıa etýge jatpaıdy.