Almatyda jańa qaýymdastyq-ortalyqtar shyǵarmashylyq, eriktilik, oqytý jáne mansaptyq ósý úshin keńistikke aınalýda. Bul týraly Almaty qalasynyń jastar saıasatyn damytý memlekettik qory dırektorynyń mindetin atqarýshy Baǵdat Anarbaeva óńirlik komýnıkasıalar qyzmeti men qalalyq jastar saıasaty basqarmasy uıymdastyrǵan baspasóz týry barysynda habarlady.
Onyń aıtýynsha, qaýymdastyq ortalyqtar bazasynda keńes berý aımaqtary, jobalyq keńseler men belsendi jastardyń kezdesýlerine arnalǵan kabınetter quryldy. Ortalyqtar open space formatynda saǵat 10.00-den 19.00-ge deıin, keıde tipti 23.00-ge deıin jumys isteıdi.
«Bizdiń qaýymdastyq-ortalyqtar - bul jaı ǵana kezdesýge arnalǵan oryn emes, olar ósýge jáne qoldaýǵa arnalǵan alań. Munda jumysqa ornalasý, qarjylyq saýattylyq, tilderdi úırený boıynsha keńester alýǵa, sondaı-aq psıhologtar men zańgerlerdiń qyzmetterin paıdalanýǵa bolad», - dep atap ótti ol.
Baǵdat Anarbaeva negizgi erekshelikterdiń biri qalanyń 30-dan astam iri volonterlik uıymdaryn biriktiretin volonterlik ortalyq bolyp tabylatynyn qosty. Dál osy jerde gýmanıtarlyq jıyndar úılestirilip, áleýmettik jobalar uıymdastyrylady.
Sondaı-aq, ortalyqtarda zamanaýı baǵyttar boıynsha óner mektepteri men kýrstar ashyldy. Sońǵy bastamalardyń biri aı saıyn ótkiziletin jasandy ıntellekt boıynsha kýrstar boldy.
«Biz jastardyń IT jáne tehnologıa salasyna degen úlken qyzyǵýshylyǵyn kórip otyrmyz. Tek sońǵy aılarda ǵana kýrstarǵa 200-den astam adam jazyldy. Baǵdarlama Sıfrlandyrý mınıstrligimen jáne jetekshi sarapshylarmen birlesip ázirlendi», - dedi Baǵdat Anarbaeva.
Budan basqa, ortalyqtar shyǵarmashyl jastarǵa qoldaý kórsetedi: dybys jazý stýdıalary jumys isteıdi, vokal, beıne kontent jáne podkast túsirý boıynsha tegin sabaqtar uıymdastyrylady.
«Biz Almaty jastarynyń damýy úshin barlyq jaǵdaıdy jasaýǵa tyrysamyz. Sondyqtan jastar ortalyqtaryn jańǵyrtý bizdiń basty basymdyqtarymyzdyń biri bolyp qala beredi», - dep basa aıtty ol.
Esterińizge sala keteıik, 2023 jyly qala ákimi Erbolat Dosaevtyń bastamasymen segiz jańa ortalyq ashyldy, al 2025 jyly olardyń sanyn 16-ǵa deıin arttyrý josparlanýda. Bul ortalyqtar jumyspen qamtý boıynsha keńes berý men qarjylyq saýattylyqtan bastap tildik kýrstarǵa, psıhologıalyq jáne zańgerlik kómekke deıin kóptegen qyzmetterdi usynady.