Qalada sot úkimin oryndaýǵa barǵan adamǵa belgili boksshy Janqosh Turarov qysym kórsetip, soqqyǵa jyqqan.
Respýblıkalyq jeke sot oryndaýshylar palatasy sot oryndaýshysyn urǵan adam boksshy Janqosh Turarovty shaqyrǵanyn málim etti, dep habarlaıdy Almaty-akshamy.kz QazAqparat saıtyna silteme jasap.
Jeke sot oryndaýshylar palatasynyń málimetinshe, sot oryndaýshysy A.A.Ermekovke shabýyl Almatynyń Bostandyq aýdanyndaǵy nysandy buzý kezinde jasalǵan.
«Nysan ıesi M.N.Ysqaqov sot oryndaýshysyn býyndyryp, ǵımaratty buzýdy toqtatýdy talap etken, keıin qabyrǵasy men ókpe tusynan urǵan. Soqqy polısıa qyzmetkerleriniń kózinshe bolǵan. Jedel járdem dárigeri soqqynyń densaýlyqqa orta dárejede zıan keltirgenin aıtty. Polısıa qyzmetkerleri qashyp ketip, oqıǵa ornynda bolmaǵan»,- dep habarlady respýblıkalyq JSO palatasynan.
Sot oryndaýshysy uryp-soǵý deregi boıynsha qylmystyq is qozǵaý týraly aryz jazyp, taıaq jegennen keıin kóshege júgirip shyqqan ýchaskelik polısıaǵa berdi.
«Oqıǵa kezinde sot oryndaýshysyna jáne basqa adamdarǵa qysym jasaý maqsatynda Ysqaqov boksshy Turarov Janqosh Jasulanulyn shaqyrǵan. Oqıǵa ornyna kelgen boksshy sot oryndaýshysynan M.N.Ysqaqovqa qatysty polısıaǵa túsirgen aryzyn alýdy talap etken. Sondaı-aq, Janqosh Turarov bul áreketti zańsyzdyq dep sanap, osy úshin qorqytqan. Keıin M.N.Ysqaqov pen J.J. Turarov A.A.Ermekovke qarsy fızıkalyq soqqy kórsetip, qorqyta bastaǵan. Tikeleı qysym kórsetilip, sot aktisiniń talaptaryn oryndaýdan bas tartýǵa májbúrlegen», - dep atap ótti palatadan.
Osyndaı keleńsiz jaıt saldarynan sot oryndaýshysy qyzmetin oryndaı almady. Buǵan deıin sot oryndaýshysy soqqyǵa jyǵylǵanyn habarlaǵan bolatynbyz.