Kórme aldaǵy bir aıǵa deıin jalǵasady
Almatyda belgili sýretshi Sergeı Kalmykovtyń jerlengen jeri tabyldy, dep habarlaıdy Almaty-akshamy.kz Almaty.tv-ge silteme jasap.
Búginge deıin onyń ómiri týraly derekter durys zerttelmeı kelgen edi. Dúnıeden ótkennen keıin de qabiriniń qaıda ekeni belgisiz bolǵan kórinedi. Ónertanýshylar men sarapshy mamandardyń atsalysýymen ol anyqtalyp, muraǵat tizimine qosyldy. Mesenattar beıit basyn retke keltirýge qolushyn bergen. Osyǵan oraı búgin Ábilhan Qasteev atyndaǵy memlekettik mýzeıde sýretshiniń kórmesi uıymdastyryldy. «Sońǵy meken» dep atalǵan joba aıasynda onyń 80-ge jýyq týyndylary qoıylǵan. Kórme aldaǵy bir aıǵa deıin jalǵasady.
«Ol qupıasy kóp sýretker. Qaı shyǵarmasy bolmasyn kópshilik túsine bermeıtin, sheshýi qıyn óner týyndylary edi. Búginde Kalmykov orys avangard óneriniń aıtýly ókilderiniń biri retinde sanalady. Bizdiń mýzeıde Sergeı Kalmykovtyń týyndylary 1967 jylydan beri saqtalyp keledi. Sýretshi shyǵarmalarynyń basqalardan ereksheligi – baıaý qanyqtyǵy», – dedi QR Eńbek sińirgen qaıratkeri Ekaterına Reznıkova.
Sýretshi 20 ǵasyr basynda Orynbordan Almatyǵa kóship kelgen. Onyń shyǵarmashylyq joly osy alyp shaharda ótti. Sergeı Kalmykov 1500 astam kartınalardyń, ılústarsıalardyń, teatr dekarasıalary men ádebı jazbalardyń avtory.