SHOB sýbektilerine keltirilgen shyǵyndy óteý jónindegi aımaqtyq komısıanyń 06.02.2022 jylǵy otyrysynda jalpy somasy 85,7 mln teńgege 39 ótinim maquldandy. Onyń ishinde 8,4 mln. teńgege 5 ótinim búdjet qarajatynan, «Jańa Alataý» qaıyrymdylyq qory qarjysynan 77,3 mln teńgege 34 ótinim óteldi, dep habarlaıdy Almaty-akshamy.kz
Komısıanyń jumysy bastalǵannan beri barlyǵy 456,1 mln teńge somaǵa 260 ótinim maquldandy, onyń ishinde búdjet qarajatynan 157,1 mln teńgege 108 ótinim, qor qarjysynan 299 mln teńgege 152 ótinim. Birinshi kezekte 5 mln teńgege deıingi tólem somasymen mıkro jáne shaǵyn bıznesten túsken ótinimder jedel qaralýda.
Aımaqtyq komısıa bızneske keltirilgen shyǵyndy óteý jónindegi qoldanystaǵy tetikke túzetýler engizýdi jalǵastyrýda. Máselen, eger buryn aımaqtyq komısıanyń usynysy boıynsha ótemaqy jeke aýdıtorlar men baǵalaýshylardyń qyzmetterine arnalǵan shyǵyndardy qamtysa, endi sot saraptamasyn júrgizý úshin búdjet qarjysy esebinen jeke advokattarǵa arnalǵan shyǵyndar da tólenýi múmkin.
«QR Qylmystyq is júrgizý kodeksiniń qoldanystaǵy normalaryna sáıkes sot saraptamasyn júrgizýge materıaldardy daıyndaýǵa tek tergeýshi ǵana emes, onyń suraýy boıynsha advokat ta jiberiledi. Qazirgi kezde tergeýshiler júktemesiniń kóp ekenin eskere otyryp, sot saraptamasyn júrgizýdi jedeldetý jáne ótemaqy tólemin alý maqsatynda biz tártipsizdik kezinde zardap shekken kásipkerlerge jeke advokattardyń qyzmetine júginýdi usynamyz. Qazir kásipkerler bul qyzmetterdi óz qarjysy esebinen tóleı alady, alaıda biz búdjet qarajaty esebinen shyǵyndy óteýge advokattyq qyzmetterge arnalǵan shyǵystardy qosý jóninde usynys ázirlep jatyrmyz. Bul shara zardap shekken bızneske memlekettik qoldaý kórsetýdi keńeıtýge jáne qala ekonomıkasyn odan ári qalpyna keltirýdi jedeldetýge múmkindik beredi», - dep habarlady SHOB sýbektilerine keltirilgen zalaldy óteý jónindegi aımaqtyq komısıanyń tóraǵasy, Almaty qalasy kásipkerlik jáne ınvestısıalar basqarmasynyń basshysy Erkebulan Orazalın.