Almaty qalasynyń Naýryzbaı aýdanyndaǵy iri saýda úılerinde turǵyndardy ınternet-alaıaqtyqtan saqtandyrý maqsatynda arnaıy eskertý maketteri qoıyldy.
Olar bankomattar men tólem termınaldary ornalasqan aýmaqtarǵa ornatylǵan. Mundaı sheshim kezdeısoq qabyldanǵan joq. Sebebi azamattar kóbine dál osy jerlerde qarjylyq operasıalar jasap, keıde alaıaqtardyń arbaýyna túsip qalady. Endi termınalǵa jaqyndaǵan adamdar aldymen eskertýdi kórip, qaýipsizdik erejelerin este saqtaı alady.
- Búginde alaıaqtar barǵan saıyn kúrdeli ádisterdi qoldanýda, al olardyń qurbany kóbine sengish azamattar bolyp jatady. Sol sebepti aldyn ala eskertý men aqparattandyrý asa mańyzdy. Saýda úılerine maketter ornatý – profılaktıkalyq jumystyń bir bóligi. Biz halyqtyń kıberqaýipsizdik deńgeıin arttyrý sharalary tek qarjyny ǵana emes, azamattardyń tynyshtyǵyn da saqtaýǵa kómektesetinine senemiz, – dedi Naýryzbaı aýdandyq polısıa basqarmasynyń bastyǵy Dıdar Jaqypbaev.
Polısıa qala turǵyndaryn qyraǵy bolýǵa, kúmándi qońyraýlar men habarlamalarǵa senbeýge jáne kúdik týyndaǵan jaǵdaıda birden "102" nómirine habarlasýǵa shaqyrady.