Almatyda qazaq kásipkerlerin biriktirgen Sana bıznes forýmy ótip jatyr.
Tek qazaq tilinde uıymdastyrylǵan bul forým bıznes jáne túrli sala ókilderin jınap, ekinshi ret ótkizilýde.
Forým Almatydaǵy «InterContinental» qonaq úıinde ótip jatyr jáne oǵan ártúrli salada tabysqa jetken 400-ge jýyq qazaq kásipkerleri qatysýda. Olar «Damý», «Inovasıa» jáne «Serpilis» atty úsh negizgi taqyryp tóńireginde qazirgi kásipkerlik máselelerin talqylaýda. Bul talqylaýlar kásipkerliktegi eń jańa úrdisterden bastap, júıeli bıznes qurý tájirıbelerimen almasýǵa baǵyttalǵan.
Ár sesıanyń spıkerleri óz salalaryndaǵy tyń ıdeıalar men tájirıbelerin bólisip, jahandyq syn-qaterler men múmkindikter jaıly pikir almasady.
«Almaty aqshamy» gazetine bergen suhbatynda joba jetekshileriniń biri Maqsat Halyq, «Sana forýmy arqyly qazaq kásipkerlerin biriktirip, elge qyzmet etetin ulttyq býrjýazıany qalyptastyrýdy» maqsat tutqandaryn atap ótken edi.
Aıta keteıik, forým búgin keshke deıin jalǵasady. Aýqymdy shara aıasynda otandyq kásipkerlerdiń kórmesi jáne túrli oıyn-saýyq baǵdarlamalary da uıymdastyrylǵan.