Almatynyń qala qurylysyn baqylaý basqarmasynyń habarlaýynsha, Ermensaı shaǵyn aýdanyndaǵy, 7-shi burylys, 8-ýchaskede ornalasqan turǵyn úı kesheni sot sheshimimen zańsyz dep tanyldy.
Nysanǵa júrgizilgen jospardan tys tekserý barysynda «MGM Development» JSHS atalǵan turǵyn úı kesheniniń qurylysyn SJT-syz, eskızdik jobany kelisýsiz, qurylys-montaj jumystarynyń bastalǵany týraly habarlamasyz, memlekettik saraptama, avtorlyq jáne tehnıkalyq qadaǵalaýsyz bastaǵany anyqtaldy.
2022 jyly 21 jeltoqsanda tapsyrys berýshige qatysty ákimshilik sharalar qoldanylyp, anyqtalǵan zańbuzýshylyqtardy joıý týraly nusqama berildi.
2023 jyly 25 sáýirde Almaty qalasynyń Mamandandyrylǵan aýdanaralyq ekonomıkalyq sotyna nysandy súrý týraly talap aryz berildi.
2023 jyly 27 jeltoqsanda Almaty qalalyq soty MAES-nyń nysandy súrý týraly sheshimin ózgerissiz qaldyrdy, menshik ıesiniń apelásıalyq shaǵymy qanaǵattandyrylmady.
Búgin nysandy súrý jumystary Ádilet departamentiniń sot oryndaýshylarynyń qatysýymen bastaldy.
Esterińizge salaıyq, Almaty ákimi Erbolat Dosaevtyń zańsyz qurylysty baqylaýdy kúsheıtý tapsyrmasy aıasynda ótken jyldyń basynan beri 50 zańsyz nysan, sonyń ishinde «Mechta», KHAN, «Alma Garden» turǵyn úı keshenderi jáne basqa da nysandar tolyq nemese jartylaı buzyldy.