Almatyda Saıran sý qoımasyna qalqyma kópir salyndy. Abattandyrý jumystary áli de jalǵasyp jatyr, - dep habarlaıdy aqshamnews.kz tilshisi 24kz-ke silteme jasap.
Qalqyma kópirdiń uzyndyǵy 251 metr. Saırannyń eki jaǵasyn baılanystyryp tur. Onyń ereksheligi sol, ár qadam basqan saıyn, sýdyń syldyryn sezinip, kól betimen ketip bara jatqandaı sezim syılaıdy. Kópir rezeńkeden jasalǵan modýldik bloktardan salynyp, jınalmaly 33 zákirmen bekitilgen. Qurylymy óte berik. Bir sharshy metriniń ózi 400 kelige deıin salmaqty erkin kóteredi.
"Qaýipsizdik týraly aıtatyn bolsaq, ol jaǵyna alańdaýǵa negiz joq. Biz ony ábden synaqtan ótkizip kórdik. Adam túgili júk tıelgen aýyr kólik júrip ótse de, kótere beredi. Máskeýde osy kópirdiń qurylymyn satyp alǵan kezde sol jerde de tekserdik. Barlyq qaýipsizdik talabyna saı keledi. Odan qıys ketken jerimiz joq", - deıdi joba jetekshisi Rınat Zilmuhamedov.
Saıran sý qoımasy 1971 jyly salynǵan. Sodan beri birneshe ret jóndeý júrgizilgenimen dál osylaı adam arnaıy izdep keletin kórikti orynǵa aınalmaǵan. Bul joly onyń jan-jaǵy adam tanymastaı ózgerdi. Qala ortasynan oazıs paıda boldy. Qazir jaqyn mańda turatyn úlken-kishi osy jerden tabylady.
Saırandy abattandyrý jumystary áli tolyǵymen aıaqtalǵan joq. Qazir bul jerde 200-ge jýyq jumysshy eńbek etip jatyr.
"Qyrkúıekke deıin jumysty aıaqtaýdy josparlap otyrmyz. Demalys aımaǵynyń negizgi bóligin abattandyrýǵa barynsha den qoıdyq. Oǵan qosa, avtomatty órt sóndirý júıesin qaıta quryp, baspaldaqpen júretin alańnyń kópshilikke yńǵaıly , qaýipsiz bolýyn nazarǵa aldyq. Munyń barlyǵy, árıne, eń aldymen kelýshilerdiń jaıly juúrip, erkin serýendeýi úshin jasalyp jatyr", - deıdi qalalyq qoǵamdyq keńistikti damytý basqarmasynyń bólim basshysynyń mindetin atqarýshy Ońalbek Qydyrbaev.
Saırannyń jaǵalaýy ekinshi arbatqa aınalýy múmkin. Otbasylyq serýen quryp, umytylmas kesh uıymdastyryp, qalanyń ásem kórinisin tamashalaýǵa bolady. Munda qazirden serýendeýge kelgen kisi qarasy qalyń. Mýzykalyq aspabyn asynyp, jandy daýyspen án shyrqaǵan ónerpazdar da barshylyq. Al sýǵa túsýge tyıym salynǵan.