Almaty qalasynyń Qoǵamdyq keńistikterdi damytý basqarmasy qalada jaıly qalalyq orta qurýǵa baǵyttalǵan jańa jobanyń bastalǵany týraly habarlaıdy. Ál-Farabı dańǵyly jáne Dýlatı kósheleriniń qıylysynda zamanaýı FLOW Park sport saıabaǵynyń qurylysy iske asyrylmaq.
Joba jeke ınvestorlar «Kusto Home» JSHS jáne «Time Group Construction» JSHS-niń qoldaýymen júzege asyrylady. Qurylysqa 3 mlrd teńge qarjy quıylǵan. Saıabaq qurylysy tek demeýshilik qarajat esebinen júrgiziledi, buǵan memlekettik búdjetten qarjy bólinbeıdi.
FLOW saıabaǵy qala turǵyndary men qonaqtary úshin salaýatty ómir saltyn ustanyp, sportpen aınalysýǵa jáne belsendi demalysqa arnalǵan jańa demalys orynǵa aınalmaq. Bolashaq saıabaq aýmaǵynda velosıped jáne jaıaý júgirý jolaqtary, ashyq aspan astyndaǵy jattyǵý qurylǵylary, oıyn jáne sport alańdary, sondaı-aq, tynyǵýǵa jáne sergitýge arnalǵan aımaqtar ornalastyrylady.
Saıabaq burynnan bar landshaftpen tolyq úılesim tabady.
FLOW saıabaǵyn salý — megapolıstegi árbir turǵyn men qonaqqa belsendi ári sapaly demalysqa arnalǵan qoljetimdi, qaýipsiz jáne ınklúzıvti qalalyq orta qalyptastyrý jolyndaǵy kezekti mańyzdy qadam.