Búgin Qazaqstanda atom elektr stansıasyn salý boıynsha respýblıkalyq referendým bastaldy. Tańerteńnen beri almatylyqtar belsendi túrde daýys berip jatyr, keıbir saılaý ýchaskelerinde uzyn-sonar kezekter baıqalýda.
Bul azamattardyń qoǵamdyq máselelerge degen qyzyǵýshylyǵy men belsendiliginiń joǵary ekenin kórsetedi.
Almatynyń Naýryzbaı aýdanyndaǵy saılaý ýchaskelerine kelgen qart kisiler tarıhı sátte tek daýys berip qana qoımaı, jastarǵa bata berip, el bolashaǵyna degen úmitterin bildirdi. Olar árbir azamattyń tańdaýy eldiń damýyna qosqan mańyzdy úles ekenin atap ótti.
«Búgin biz mańyzdy másele boıynsha óz pikirimizdi bildirip, jastarymyzdyń jarqyn bolashaǵyna úmittenemiz», – dedi daýys berýshilerdiń biri.
Referendýmǵa tanymal qoǵamdyq qaıratkerler, sportshylar, jáne artıser de qatysyp jatyr. Almaty ákimi Erbolat Dosaev jubaıymen birge №48 mektep-lıseıindegi №388 saılaý ýchaskesine baryp, alǵashqy daýys berýshilerdiń biri boldy.
Almaty qalasynda 624 saılaý ýchaskesi jumys istep tur. Qala turǵyndary turǵylyqty mekenjaıy boıynsha saılaý ýchaskelerine baryp, saǵat 20.00-ge deıin daýys bere alady.