Megapolıste elimizdiń kórnekti qos batyry, “Halyq qaharmandary” – Saǵadat Nurmaǵambetov pen Rahymjan Qoshqarbaevtyń 100 jyldyq mereıtoıyna arnalǵan aýqymdy sport festıvali ótip jatyr.
Shahardaǵy 28 gvardıashy-panfılovshylar saıabaǵynda Almaty qalalyq Sport basqarmasynyń muryndyq bolýymen uıymdastyrylǵan erekshe is-shara elimizdiń túkpir-túkpirinen kelgen úzdik sportshylar men sport súıer qaýymnyń basyn, tilegin, nıetin qosýda.
Olar saıabaq tórindegi “Máńgilik alaýǵa” gúl shoqtaryn qoıyp, batyrlarymyzǵa qurmet kórsetti.
Festıvál qatysýshylary uly dala halqynyń dástúrli oıyny – asyq atýdan jarysyp, boz kilemde qazaqsha kúresten oıyn órnegin kórsetýde.
– Búgin saıabaq ishi erekshe kúıge bólenip tur. Saǵadat Nurmaǵambetov pen Rahymjan Qoshqarbaev syndy qos tulǵany jas urpaqqa úlgi tutyp, osylaı dáriptep jatqandaryńyzǵa qýanyshtymyn. Saǵadat Nurmaǵambetov jetkinshekterdiń bilimdi de bilekti bolǵanyn qalaıtyn, sol jolda eńbek etti. Osyndaı patrıottyq-sporttyq is-sharalardyń árdaıym belortasynda júrdi. Sondyqtan búgingi súıkimdi balalar men bilekti eresekterdiń qatar turyp, festıválge atsalysyp jatqanyn kórse, sózsiz qýanar edi. Sport ta adamdardy jaqyndastyrady, shyńdaıdy, sergektik syılaıdy jáne jańa jetistikterge shabyttandyrady. Men de elimizdiń tarıhyna altyn áriptermen jazylyp qalǵan qos batyrymyzdyń esimin keıingi urpaq umytpasa eken deımin, – dedi “Halyq qaharmany” Saǵadat Nurmaǵambetovtiń nemeresi Aıjan Talǵatqyzy.
Al İİM maıory, túıepalýan Tımýr Sypataev 200-dik shegeni jalań qolymen ıip, júrekshe jasap, sportty súıetin órenderge syılady.
Festıvál jeńimpazdary baǵaly syılyqtarmen marapattalady.
Biz sózge tartqan 42 orta mekteptiń 4-synyp oqýshysy Aıqyn Baqytjanulynyń kúres úıirmesine baryp júrgenine eki jyldan asypty. Búgingi festıválde júldeli bolamyn dep tas bekinip otyr. Sáttilik tileımiz baldyrǵandarǵa!