Almaty ákimdiginiń delegasıasy Qytaı Halyq Respýblıkasyna jasaǵan sapary aıasynda qala ákimi Darhan Satybaldy robototehnıka salasyndaǵy álemdik kóshbasshylardyń biri Unitree Robotics kompanıasynyń basshylyǵymen kezdesti.
Kelissóz nátıjesinde taraptar Almatyda robototehnıka salasyndaǵy birlesken zerthana qurý jóninde memorandýmǵa qol qoıdy. Jańa ortalyq mobıldi robototehnıka, avtonomdy navıgasıa jáne jasandy ıntellekt tehnologıasyn damytý men engizýdiń mańyzdy alańyna aınalmaq. Jobany Almaty qalasy ákimdigi Freedom Holding Corp. kompanıasynyń strategıalyq qoldaýymen júzege asyrady.
Unitree Robotics kompanıasy robototehnıkalyq jabdyqtardyń jahandyq naryǵynda jetekshi orynǵa ıe jáne mobıldi ári kópfýnksıaly robottardy shyǵaratyn eń iri úsh óndirýshiniń qataryna kiredi. Kompanıa álemdik tórtaıaqty robottar naryǵynyń shamamen 62 paıyzyn jáne Azıa naryǵynyń 75 paıyzynan astamyn ıelenip otyr.
Almaty ákimi Darhan Satybaldynyń aıtýynsha, zerthananyń ashylýy megapolıstiń ınovasıalyq ekojúıesin qalyptastyrý men joǵary tehnologıa salasyna ınvestısıa tartý baǵytynda mańyzdy qadam bolmaq.
Óz kezeginde Unitree Robotics kompanıasynyń teń quryltaıshysy jáne atqarýshy dırektory Chen Lı Qazaqstanda robototehnıkany damytý isine belsendi atsalysýǵa daıyn ekenin bildirdi.
Aıta keteıik, Almatyda ashylatyn birlesken zerthana qalany sıfrlandyrý strategıasyn júzege asyrýdyń, kadrlyq jáne tehnologıalyq áleýetti arttyrýdyń, sondaı-aq joǵary tehnologıalyq ınvestısıa tartýdyń mańyzdy kezeńi bolmaq.