Ulttyq ulan qataryna Otan aldyndaǵy boryshyn óteýge kelip, ómirlik jolyn áskerı qyzmetpen baılanystyrýdy sheshken Balǵyn Aıdynnyń taǵdyry dál osylaı qalyptasty. Ol úshin merzimdi áskerı qyzmet bir jyldan ǵana turmaı, kásibı jáne tulǵalyq ósýdiń, sanaly tańdaýdyń bastaýy boldy.
Prezıdent jarıalaǵan Jumysshy mamandyqtar jyly aıasynda QR İİM Ulttyq ulany qoǵamdyq tártipti qamtamasyz etý mindetterin oryndaýmen qatar, jas mamandardyń óz arman-maqsattaryn júzege asyrýyna naqty múmkindikter jasap keledi.
"Ońtústik" óńirlik qolbasshylyǵynyń 5513 áskerı bóliminde qyzmet atqaratyn ulandyqtyń ómir joly – sózimizdiń aıqyn dáleli.
Áskerge Taldyqorǵan qalasynan shaqyrtylǵan 25 jastaǵy Balǵyn Aıdyn Taraz qalasyndaǵy 5513 áskerı bólimine birden kásibı daıyndyqpen keldi. Sebebi ol – Semeı medısınalyq ýnıversıtetinde alǵan jeti jyldyq bilimi men dáriger-terapevt dıplomy bar maman edi.
Alǵashqy alty aıda Balǵyn Taraz qalasynyń kóshelerinde qoǵamdyq tártipti qamtamasyz etip, patrúldik qyzmet atqardy. Dál osy kezeńde áskerı ortada óz biliminiń qajet ekenin túsinip, Balǵyn Aıdyn Ulttyq ulan qatarynda kelisimshart negizinde qyzmet etýge sheshim qabyldady.
Áskerı bólim basshylyǵy jas mamannyń tańdaýy men kásibı daıyndyǵyn eskerip, onyń jaýapkershiligi men yntasyn joǵary baǵalady. Búginde Balǵyn Aıdyn áskerı bólimniń medısınalyq pýnktiniń bastyǵy laýazymyn atqarady.
Onyń negizgi mindeti — jeke quramnyń densaýlyǵyn qadaǵalaý, áskerı qyzmetshilerdiń saýyǵyp, qatarǵa tez oralýyna jaǵdaı jasaý. Ol bul mindetterdi dárigerlik dáldik pen áskerı tártipti saqtaı otyryp, abyroımen oryndap keledi.
Jaqyn arada Balǵyn Aıdyn óziniń eń alǵashqy ofıserlik áskerı shenin – leıtenant alady.
Bul oqıǵa – bir rettik mysal emes, QR İİM Ulttyq ulanynda jolǵa qoıylǵan júıeli jumystyń nátıjesi. Munda merzimdi áskerı qyzmet kásibı damýdyń bastaýy bolyp, túrli mamandyqtar áskerdiń áleýetin nyǵaıtatyn mańyzdy resýrsqa aınalady.
Ulttyq ulan – bilim men tájirıbesi ushtasyp, áskerı qyzmetti kelisimshart boıynsha jalǵastyrý sanaly sheshimge ulasatyn orta.