Megapolıste «Kóshbasshylyq jáne turaqty damý» IV respýblıkalyq densaýlyq saqtaý basshylarynyń forýmy ótti. Oǵan Almaty qalasy ákiminiń orynbasary Ásem Núsipova qatysyp, sóz sóıledi.
«Qazaqstannyń densaýlyq saqtaý menedjerleriniń qaýymdastyǵy» respýblıkalyq qoǵamdyq birlestiginiń uıymdastyrýymen ótken alqaly jıynda otandyq jetekshi sarapshylarmen birge, Garvard ýnıversıteti (AQSH), Kıngs koleji (Ulybrıtanıa) sıaqty bedeldi oqý jáne zertteý mekemeleriniń álemdik deńgeıdegi jetekshi mamandary, sondaı-aq Germanıadan kelgen sarapshylar da sóz alyp, tájirıbelerimen bólisip, halyqaralyq jáne jahandyq deńgeıdegi ádis-tásilderin usyndy.
Forýmnyń negizgi maqsaty – densaýlyq saqtaý salasyndaǵy jumystardyń tıimdiligin arttyrýǵa, onyń basshylary arasynda kóshbasshylyqty nyǵaıtýǵa jáne qazirgi zamanǵy syn-qaterler jaǵdaıynda salany ornyqty damytýǵa baǵyttalǵan strategıalar men sheshimderdi ázirleý.
Iá, densaýlyq saqtaý salasyn zaman kóshinen qalmaı súıreý úshin jańashyl basshy kerek ekeni daýsyz. Bul baǵytta jetekshiniń kóshbasshylyq qasıeti úlken ról atqarady. Kadr biliktiligi, ınfraqurylym sapasy da kóp máseleni sheshedi. Forým tórinde densaýlyq saqtaý salasyndaǵy basshylardyń kóshbasshylyq qasıetteri men quzyretteri; medısınalyq qyzmetkerlerdiń mártebesin qoldaýdaǵy basshylardyń róli; densaýlyq saqtaý salasyndaǵy strategıalyq josparlaý; tıimdi menedjment tájirıbesi, ıaǵnı sátti keıster talqylandy.
Sondaı-aq, medısına mekemeleri ınfraqurylymynyń qazirgi ahýaly, kadrl tapshylyǵy jáne medısınalyq qyzmetterdiń sapasyn arttyrý joldary qaýzaldy. Iá, búginde elimizdegi densaýlyq saqtaý ǵımarattarynyń 49,3%-y tozǵan, basym kópshiligi jarty ǵasyr buryn salynǵan. Keı óńirlerde medısınalyq jabdyqtardyń jetispeýshiligi de ózekti taqyrypqa aınalǵan.
Forýmda medısınalyq qyzmet sapasyn baqylaý jáne standarttaý taqyryby da kóterildi. Máselen, spıkerler kóptegen memlekettik klınıkalarda pasıentterge sapaly qyzmet kórsetýge arnalǵan baqylaý júıesiniń álsizdigin alǵa tartty. Al jekemenshik sektorda bul baǵyttaǵy jumystar aıtarlyqtaı jaqsy jolǵa qoıylǵan degen pikirde.
Forým qatysýshylary memlekettik-jekemenshik áriptestik, jeke ınvestorlar arqyly aýyldyq jerlerdegi densaýlyq saqtaý deńgeıin kóterý, medısınalyq mekemelerdiń tolyqtaı sıfrlandyrylýy máselesin de kóterdi.
Jalpy, atalǵan forým bilim men tájirıbe almasýǵa, sondaı-aq elimizde medısınany damytýdyń bolashaq baǵyttaryn talqylaýǵa arnalǵan biregeı platformaǵa aınala bildi.
– Men bul forýmǵa bıyl ekinshi márte qatysyp otyrmyn. Naqty jol kórsetetin, baǵdar beretin alqaly jıyn. Jasyratyny joq, qazirgi kúni kredıtorlyq bereshegi bar medısına mekemeleri az emes. Bul jaǵdaı bizdiń de basymyzda bar. Búgin osy másele de, odan shyǵý joldary da talqylandy. Biz bereshegimizden qutylýdy osydan erterek bastap ketkenbiz. Shyny kerek, shalǵaı aýyldarǵa, shaǵyn qalalarǵa jas mamandar kele bermeıdi. Olar oqýdy bitire salyp jumysyn birden alyp shaharlarda bastaǵysy keledi. Al negizinde tájirıbe jınaqtaý úshin shaǵyn emhana, aýrýhanalardan bastaý mańyzdy. Kóp óńirde balalar dárigerleri jetispeıdi. Bul da búgingi problema. Medısınalyq qyzmettiń sapasy tómen bolsa, naýqastar tarapynan aryz-shaǵym da kóp bolady. Biz bilikti mamandardy 160 myń turǵyny bar Jańaózen qalasyna arnaıy shaqyryp, jalaqysyna qosa ústemaqy tólep, baspana berip, qatarymyzǵa tarttyq. Olar qazir ózimizdegi mamandardy zamanaýı apparattardyń tilin meńgerýge úıretip jatyr. Bıyl jyl sońyna deıin kredıtorlyq bereshegimizden tolyqtaı qutylamyz dep otyrmyz. Maqsatymyz – turǵyndarǵa sapaly qyzmet kórsetý, – deıdi forým qonaǵy, Jańaózen (Mańǵystaý oblysy) qalalyq kópbeıindi aýrýhana dırektorynyń emdeý isi jónindegi orynbasary Marat Edilhanov.