Almaty ákimi Erbolat Dosaev jumys sapary barysynda Bostandyq aýdany Kóktem-1 shaǵyn aýdanyndaǵy jóndeýden ótken №138 mektepti kórip shyqty, dep habarlaıdy aqshamnews.kz portaly.
1989 jyly salynǵan ǵımarattyń konstrýksıasynyń senimdiligin tehnıkalyq tekserý nátıjesinde qala ákimi mektepti seısmıkalyq nyǵaıtý men kúrdeli jóndeýden ótkizý jóninde tapsyrma berdi.
Merdigerlik uıymnyń jumysy 2023 jyldyń jeltoqsanynda bastalyp, bıyl qazan aıynyń sońynda aıaqtaldy. Rekonstrýksıa jobasynda ǵımarattyń júktemeni kóterýshi qurylymyn nyǵaıtýǵa erekshe kóńil bólindi. Jobada qasbet pen shatyrdy jóndeý, ınjenerlik júıelerdi aýystyrý jáne ǵımarattyń ishki árleýi qarastyrylǵan.
Oqý orny bıologıa, robototehnıka, ınformatıka, hımıa pánderine arnalǵan ınteraktıvti taqtalar men planshettermen jabdyqtalǵan kabınettermen qamtylǵan. Sonymen qatar, zamanaýı standarttarǵa sáıkes eki sport jáne akt zaly jabdyqtalǵan. Fýtbol alańy men sport alańy jańartyldy. Mektepte qaýipsizdikti qamtamasyz etý maqsatynda beınebaqylaý kameralary men bet-álpetti taný múmkindigi bar týrnıketter ornatylǵan. Mektepte 797 bala memlekettik tilde oqıtyn bolady.
Erbolat Dosaev bilim basqarmasynyń basshysy men mektep ákimshiligine mektepti II toqsannyń basyna deıin Kitap.kz sıfrlyq kitaphanasyna qosý jóninde tapsyrma berdi. Bul kitaphana oqýshylarǵa elektrondy jáne aýdıo formattaǵy 6000-nan astam kórkem ádebıet shyǵarmasyna qoljetimdilikti qamtamasyz etedi. Sonymen qatar, aýdan ákimdigine mektepke jaqyn aýmaqtyń sanıtarlyq jaǵdaıyn qamtamasyz etý júkteldi.
Aıta ketý kerek, oqýshylardyń orny tapshylyǵyn qysqartý maqsatynda qalada búgingi tańda Zerdeli shaǵyn aýdanynda 550 oryndyq mektep, ártúrli aýdandarda 5 qosymsha qurylys, sondaı-aq 6 mekteptiń kúrdeli jóndeýi men rekonstrýksıasy júrgizilýde. Buǵan qosa, megapolıste «Jaıly mektep» ulttyq jobasy boıynsha 21 nysannyń qurylysyn júrgizý jalǵasýda. Eske salsaq, qaladaǵy alǵashqy «Jaıly mektep» bıyl qyrkúıek aıynda ashyldy.