2023 jylǵy 19 sáýirden bastap júrgizýshilerge Raıymbek dańǵyly boıynsha Saın kóshesinen Iassaýı kóshesine deıin jumys kúnderi saǵat 20:00-den 06:30-ǵa deıin jol ýchaskesinde qoǵamdyq kólik úshin bólingen jolaqtar boıynsha jol júrýge ruqsat etiledi.
Bul týraly Almaty qalalyq mobıldilik basqarmasy málimdedi, dep habarlaıdy Almaty-akshamy.kz.
Demalys jáne mereke kúnderi osy ýchaskede barlyq avtomobıldere ýaqyt shekteýinsiz jol júre alady.
Kólik qozǵalysyna osy jańalyqtyń engizilýi qala ishindegi avtomobıl legin tıimdi qurý úshin, sondaı-aq "qarbalas shaqta" jáne demalys kúnderi arnaıy bólingen avtobýs jolaqtaryn paıdalaný máselesin sheshý úshin testilik rejımde engiziletin bolady.
Bólingen jolaqtar boıynsha kólik quraldarynyń qozǵalysyn ózgertý 2023 jyldyń sońyna deıin kúshinde bolady. Sodan soń salystyrmaly derekter negizinde kólik legin uıymdastyrý týraly sheshim qabyldanady. Júrgizýshiler belgilengen jol belgilerin basshylyqqa alyp, QR Jol qozǵalysy erejeleriniń talaptaryn saqtaýlary tıis.
Eske salsaq, bul shara pılottyq jobanyń ekinshi kezeńi bolyp tabylady. 2022 jyldyń naýryzynda qoǵamdyq kólikke bólingen jolaqtar boıynsha jol qozǵalysyn uıymdastyrýdyń qoldanystaǵy syzbasyna ózgeris engizildi.
