Qazaqstan polısıasy kúni qarsańynda Jetisý aýdandyq polısıa basqarmasynda qyzmettik mindetin atqarý kezinde qaza tapqan polısıa qyzmetkerlerin eske alýǵa arnalǵan monýment ashyldy.
Sharaǵa Almaty qalalyq PD-nyń basshylyǵy, jeke quram, ardagerler men qaza tapqan polıseılerdiń týystary qatysty, dep habarlaıdy Almaty-akshamy.kz Polisia.kz-ke silteme jasap.
«Qazaqstannyń táýelsizdik alǵan jyldarynan beri 80-nen astam almatylyq tártip saqshysy qyzmettik mindetterin atqarý kezinde, onyń 37-si qylmyspen ymyrasyz kúreste qaza tapty. Olar týystary men áriptesteriniń máńgilik jadynda. Biz Qazaqstan Respýblıkasy azamattarynyń beıbit ómiri jolynda janyn qıǵan árbir qaza bolǵan polısıa qyzmetkeriniń beınesin, ıgi isteri men erlikterin jadymyzda, júregimizde saqtaımyz. Olardyń barlyǵy Otan aldyndaǵy boryshyn janqıarlyqpen, adal atqardy. Olardyń erligi men qaharmandyǵy qurmetke laıyq jáne úlgi bolmaq», – dedi Almaty qalalyq polısıa departamentiniń bastyǵy Arystanǵanı Zapparov.
Endi monýment aıasynda jas qyzmetkerlerdiń Ant qabyldaý rásimderi ótkizilip, mereke kúnderi osynda saltanatty is-sharalar ótkizý josparlanýda.
«Qylmysqa qarsy kúres jáne quqyq qorǵaý salasyndaǵy qyzmettik boryshyn abyroımen atqarýǵa daıyndyǵy ishki ister organdary qyzmetkerleriniń kásibı is-áreketinen aıqyn baıqalyp tur. Osy aralyqta polısıa departamenti qaza bolǵan qyzmetkerlerdiń otbasylaryna jan-jaqty qoldaý, kómek kórsetýdi jalǵastyrýda, áleýmettik-turmystyq máselelerdi sheshýge belsene atsalysyp keledi. Olar máńgi bizdiń júregimizde», – dedi Arystanǵanı Zapparov.