4 qazanda Almaty onkologıalyq ortalyǵynda sút bezi qaterli isigine qarsy kúres aılyǵy "Qyzǵylt qazan" aıasynda ashyq esik kúni ótti.
Aksıanyń maqsaty — áıelderdiń onkologıalyq aýrýlardy erte anyqtaýdyń mańyzdylyǵyn arttyrý jáne profılaktıkalyq tekserýden turaqty ótý mádenıetin qalyptastyrý.
Ashyq esik kúni aıasynda 81 áıel mamandardyń qabyldaýynda boldy. Tekserý nátıjesinde 6 áıelden qosymsha zertteýdi qajet etetin kúmándi ózgerister anyqtaldy. Al ózine qoıylǵan dıagnozdy naqtylap, ózge mamannan keńes alýǵa kelgen bir naýqasta sút bezi qaterli isigi dıagnozy burynnan rastalǵan eken. Qazirgi tańda ol Almaty onkologıalyq dıspanserinde em qabyldap jatyr. Emdeý barysy oń nátıje kórsetip, dárigerler sanıtarlyq mastektomıany usynyp otyr.
Sonymen qatar, 62 áıelge sút beziniń últradybystyq zertteýi (ÝDZ) júrgizildi.
Aıta keteıik, aksıa Almaty turǵyndarynyń ǵana emes, sonymen birge Qonaev qalasy men Almaty oblysynyń, sondaı-aq Astana men Aqmola oblysynyń áıelderiniń de qyzyǵýshylyǵyn týǵyzdy.
"Qyzǵylt qazan" aılyǵy aıasynda osyndaı ashyq esik kúnderi 11 jáne 18 qazan kúnderi de jalǵasyn tabady. Kez kelgen áıel osy kúnderi tegin tekserýden ótip, qaterli isiktiń aldyn alý men erte anyqtaý joldary jóninde mamandardan keńes ala alady.
Mundaı sharalar dertti erte anyqtaýǵa múmkindik berip qana qoımaı, áıelderdiń óz densaýlyǵyna degen jaýapkershiligin arttyrýǵa septigin tıgizedi.