Qyzylordada jasóspirimder arasyndaǵy daý aýyr jaraqatqa ulasty. Qaladaǵy №267 mekteptiń 15 jastaǵy oqýshysyn pyshaqtap ketken. Oqıǵa kúndizgi ýaqytta, ıaǵnı sabaqtan tys mezgilde bolǵan, - dep habaralaıdy aqshamnews.kz tilshisi Informbúro 31-ge silteme jasap.
Kýágerlerdiń aıtýynsha, joǵary synyp oqýshysy men kolej stýdenti arasynda sózge kelispeýshilik týyndap, artynsha janjal tóbeleske ulasqan. Sol sátte taraptardyń biri ekinshisine sýyq qarý qoldanǵan. Osylaısha mektep oqýshysy ish jáne keýde tusynan jaraqat alǵan. Dárigerler zardap shekken jasóspirimniń jaǵdaıyn ortasha aýyr dep baǵalap otyr. Qazir ol qalalyq aýrýhananyń jansaqtaý bóliminde em qabyldap jatyr.
Al kúdikti kóp uzamaı polısıa qyzmetkerlerimen ustalyp, ýaqytsha ustaý ızolátoryna qamaldy. Qyzylorda oblystyq polısıa departamenti basshysynyń orynbasary Serik Toqtybaevtyń aıtýynsha, oqıǵa boıynsha Qylmystyq kodeksiniń 106-baby, 1-bóligi "Kámeletke tolmaǵan adamǵa qasaqana aýyr dene jaraqatyn salý" boıynsha qylmystyq is qozǵalǵan.
"Qazir oqıǵanyń barlyq mán-jaıyn anyqtaýǵa baǵyttalǵan tergeý amaldary júrgizilip jatyr. Saraptamalar taǵaıyndaldy", – dedi Serik Toqtybaev.
Mektep ákimshiligi bolsa, oqıǵa sabaqtan tys ýaqytta bolǵanyn aıtyp, bul jaǵdaıdyń bilim ordasyna qatysy joq ekenin jetkizdi. Quqyq qorǵaý organdary ata-analar men ustazdardy balalardyń minez-qulqyna, ortasyna jáne áleýmettik jelidegi belsendiligine kóbirek nazar aýdarýǵa shaqyrdy.