Mundaı kórsetkish 2022 jyldyń qorytyndysyna sáıkes shyǵarylyp otyr.
Eger birinshi toqsanda kún saıyn orta eseppen 120 qylmys jasalsa, jeltoqsan aıynyń sońynda bul kórsetkish 60-qa deıin tómendedi, dep habarlaıdy Almaty-akshamy.kz Polisia.kz-ke silteme jasap.
«Qaladaǵy qylmysty azaıtý úshin qosymsha sharalar qabyldaýdamyz. Krımınogendik jaǵdaıdy taldaýǵa sáıkes, polısıanyń jekelegen modýldik posttary quqyq buzýshylyqtar kóp oryn alatyn jerlerge kóshirildi. Sondaı-aq qala joldarynda jáne aýlalarynda aldyn alý sharalary kúsheıtilip, jaıaý patrúldeý jumystary júrgizilip jatyr. Kúshter men quraldardy manevrleý krımınogendik jaǵdaıdy taldaýdy eskere otyryp, jedel júzege asyrylady. Sonymen qatar jappaı tártipsizdikter kezinde urlanǵan jáne joǵalǵan qarýlardy izdeý jumystaryn jalǵastyrýdamyz. Jalpy, Almaty polısıasynyń jeke quramy shahardaǵy qoǵamdyq tártipti qamtamasyz etip, qaladaǵy qylmysty azaıtý úshin barlyq qajetti sharalardy qabyldap jatyr. Biz óz aldymyzǵa qala turǵyndaryn qaýipsizdik sezimimen qamtamasyz etýdi maqsat etip qoıdyq. Bul mindetti qoǵammen birlese otyryp, atqara alamyz», – dedi Almaty qalalyq polısıa departamentiniń bastyǵy Arystanǵanı Zapparov.
Qabyldanǵan sharalardyń nátıjesinde Almaty polısıasy qaraqshylyq shabýyl, tonaý, bóten adamdardyń kólikterin urlaý, páter tonaý, qoǵamdyq oryndarda avtokólikter men jeke múlikterdi urlaýmen aınalysqan 307 qylmystyq toptyń qylmystyq áreketiniń jolyn kesti. Sondaı-aq, 638 urlyqty jasaǵany dáleldengen 391 ury ustaldy.