Búgin 21 naýryz - Halyqaralyq qýyrshaq teatry kúni.
Halyqaralyq qýyrshaq teatry kúni 2003 jyldyń 21 naýryzynan beri toılanyp keledi. Osyǵan oraı Almaty qalasyndaǵy qýyrshaq sheberleri kásibı merekelerin atap ótýde, dep habarlaıdy Almaty-akshamy.kz.
Almaty qalasynyń Memlekettik qýyrshaq teatry sheberlik sabaǵyn uıymdastyryp, eresekter men balalarǵa qýyrshaqtardyń jasalý jolyn, akterlerdiń oınaý ádisterin kórsetti.
Aktrısa Erkesh Júnisovanyń aıtýynsha, qýyrshaqtardy qolmen qımyldatyp, dybystaý, olarǵa jan bitirý - úlken óner.
"Qýyrshaqtardyń túr-túri bar. Olardy qolǵa kıip, qol arqyly oınatý kerek. Teatr qýyrshaqtarynyń árqaısysy ártúrli tehnologıamen jasalady. Saýsaqqa arnalǵan shaǵyn qýyrshaqtan bastap, qolǵa kıgiziletin, jip arqyly basqarylatyn túrlerin kórermen jaqsy biledi. Sahnadaǵy tanymal ertegi keıipkerleri teatr sheberleriniń qolynan shyqqan. Osy sheberhanada qarapaıym zattardan bastap keremet óner týyndylary jasalady", - deıdi aktrısa.
88 jyldyq tarıhy bar Almaty qalasynyń Memlekettik qýyrshaq teatry – elimizdegi eń iri óner ujymdarynyń biri. Teatr ujymy búginde talantty artıser men qýyrshaq sheberleriniń, rejıserlerdiń, sýretshilerdiń birneshe urpaǵyn tárbıelep shyǵardy. Elimizde jáne shetelde ótken Halyqaralyq, respýblıkalyq teatr festıvalderinde bıik belesterdi baǵyndyrǵan ujymnyń alǵa qoıǵan baǵyty men baǵdary da aıqyn. Ol – qazaqtyń qýyrshaq teatry ónerin órkendetý, keshegi men búgingi ómir arasyn ónerdiń bıik shyńy arqyly shynaıy kórsete bilý.
Búginde memlekettik qýyrshaq teatrynyń qoıylymdaryna arnalǵan 500-den asa qýyrshaq bar eken. Teatr sahnasynda jyl saıyn 5 jańa spektákldiń tusaýy kesiledi. Iaǵnı, repertýar tolyǵyp, jańa keıipkerlerdiń sany kóbeıip otyrady.
