Almaty turǵyndaryn alańdatyp otyrǵan barlyq jaǵdaı eskerildi.
Almaty qalasy qalalyq Josparlaý jáne ýrbanıstıka basqarmasynyń basshysy Almasqan Ahmedjanov Óńirlik komýnıkasıalar qyzmetinde ótken baspasóz konferensıasynda bir aı buryn qabyldanǵan qurylys júrgizýdiń jańa Erejelerin eske saldy. Ol jańarǵan talaptardyń artyqshylyǵy jáne onyń megapolıstiń damýyna qalaı áser etetinin túsindirdi, dep habarlaıdy Almaty-akshamy.kz.
Almasqan Ahmedjanov jańa erejelerdiń qabyldanýyna "Almaty qalasynyń erekshe mártebesi týraly", "Jergilikti memlekettik basqarý jáne ózin-ózi basqarý týraly", "Sáýlet, qala qurylysy jáne qurylys qyzmeti týraly" zańdarǵa engizilgen ózgeristerdiń yqpal etkenin aıtty.
Qalanyń sáýlettik kelbetin qalyptastyrý jáne qala qurylysyn josparlaý ákim Baqytjan Saǵyntaevtyń tapsyrmasy boıynsha jasaldy. Bıylǵy jyldyń 17 aqpanynda atalǵan qujattyń jobasy Almatynyń bas josparyn túzetý jobasy boıynsha jumys tobynyń talqylaýyna usynyldy. Joba 25 naýryzda NQA portalynda jarıalandy. Talqylaý barysynda qala qurylysy qyzmetiniń barlyq qatysýshylarynyń pikiri eskerildi. Onyń ústine, megapolıstiń qurylysy boıynsha bazalyq talaptar saqtaldy.
"Almaty ákimi Baqytjan Saǵyntaevtyń tapsyrmasy boıynsha jasalǵan qujatqa qatysty jan-jaqty jumys júrgizildi. Almaty turǵyndaryn alańdatyp otyrǵan barlyq jaǵdaı eskerildi. Sonymen qatar qurylys kompanıalarynyń zańdy múddeleri bar, olar qarastyrylýy tıis", - dedi Almasqan Ahmedjanov.
Mysaly, qurylys salýdyń jańa erejelerin qabyldaǵannan keıin qurylys salýshylar jobalaý aldyndaǵy qujattamany alǵanǵa deıin qurylys jobalaryna qoǵamdyq talqylaý júrgizýge mindetti.
Eskızdik jobany ázirleý kezinde qurylys salýshy:
1) erekshe qurylystyq retteý aımaqtarynda reglamentti saqtaý (mysaly, ortalyqta);
2) qabat sanyn qadaǵalaý;
3) áleýmettik ınfraqurylymnyń bolýyn esepke alý (medısınalyq mekemeler, balabaqsha men mektepter, polısıa pýnktteri);
4) halyq tyǵyzdyǵyn esepke alý.
Qalalyq josparlaý jáne ýrbanıstıka basqarmasynyń basshysy jańa erejeler boıynsha halyqtyń tyǵyzdyǵy aspaýy tıis ekenin aıtty:
- Tarıhı ortalyqta gektaryna 300 adam,
- 440 qalǵan aýmaqtarda.
"Aýla aımaǵyn damytý úshin bir adamǵa 10 sharshy metr aýla normasy engizilgeni mańyzdy, onyń tórtten bir bóligi jasyl jelekterge bólinedi. Nelikten qandaı da bir nysan Erejege sáıkes kelmeıdi degen suraqtarǵa keletin bolsaq, Erejelerdiń barlyq talaptary tek jańa qurylysqa ǵana qoldanylatynyn eske salamyn, óıtkeni zańnyń keri kúshi joq", – dedi Almatynyń bas sáýletshisi.
Memleket basshysynyń megapolısti damytý jónindegi tapsyrmasyna sáıkes erejelerde Almatynyń qaıtalanbas sáýlettik kelbetin saqtaýǵa jáne árbir qala turǵynyna jasyl jelekterdiń sanyna erekshe oryn berilgen.