3-4 qazan aralyǵynda Almatyda Qurmanǵazy atyndaǵy Qazaq ulttyq halyq orkestriniń 90 jyldyǵyna arnalǵan mereıtoılyq is-sharalar ótedi. Bul týraly Almaty qalasynyń Óńirlik komýnıkasıalar qyzmetiniń alańynda orkestr dırektory Medet Qýanyshev málimdedi, - dep habarlaıdy aqshamnews.kz.
Spıkerdiń aıtýynsha, merekelik is-sharalarǵa kórshi elderdiń halyq ártisteri arnaıy shaqyrylǵan, olar osyndaı mańyzdy kúndi atap ótýge óz úlesterin qosady.
«Bul tek Qurmanǵazy atyndaǵy Qazaq Ulttyq halyq orkestriniń ǵana emes, jalpy qazaq óneriniń mereıtoıy. Kópten kútken uly toı Almaty qalasyndaǵy Qurmanǵazy orkestiriniń ǵımaratynda 3-4 qazan aralyǵynda toılanatyn bolady. Keshke Ózbekstan Respýblıkasynyń halyq ártisi Farýh Sadyqov pen Qyrǵyzstan Respýblıkasynyń halyq ártisi Baqyt Tilegen arnaıy shaqyrtýmen keledi. Sondaı-aq, Nurjamal Úsenbaeva, Talǵat Kúzembaev jáne Aıgúl Kenbaeva sıaqty elimizdiń halyq ártisteri óner kórsetedi», - dedi Medet Qýanyshev.
Qalamyzdyń qonaǵy, Ózbekstan Respýblıkasynyń Halyq ártisi Farýh Sadyqov Qazaqstan men Ózbekstannyń mýzykalyq ujymdary arasyndaǵy yntymaqtastyq dástúrli mýzykanyń damýyna qalaı áser etetindigi týraly aıtty.
«Eń aldymen, qazaq baýyrlarymdy búgingi merekesimen quttyqtaımyn. Shaqyrtýǵa rahmet, osyndaı tájirıbe almasý ádisteri ujymdy baıytady. Biz qazaq-ózbek óneriniń ujymy bir-birimizge kómektesip, tolyqtyryp otyramyz. Bastysy - shyǵarmashylyq dostyǵymyzdy saqtap qalý. «Dos bolý ońaı, al dostyqty saqtaý qıyn» deıdi, al bizdiń shyǵarmashylyq dostyǵymyz 40 jyldan astam ýaqyt boıy saqtalyp keledi», - dedi Farýh Sadyqov.
Brıfıńke orkestrdiń bas dırıjeri Abylaı Tilepbergen de qatysty. Ol ujym jumysynyń mańyzdy aspektisi dástúrli qazaq mýzykasy men zamanaýı mýzykalyq úrdister arasyndaǵy tepe-teńdikti izdeý ekenin atap ótti. Onyń aıtýynsha, orkestr klasıkalyq shyǵarmalardyń jańa túsindirmelerin izdeıdi, bul olardyń ózektiligin saqtaýǵa jáne tyńdaýshylardyń jańa býynynyń nazaryn aýdarýǵa kómektesedi.
Orkestrdiń mereıtoıyna arnalǵan saltanatty is-sharalar «İnjý-Marjan» degen ataýmen 2024 jylǵy 3 qazanda bastalady, al 4 qazanda Qazaqstannyń túrli óńirlerinen kelgen orkestrlerdiń bas dırıjerleriniń qatysýymen «Dırıjerler sherýi» ótedi.
Mereıtoılyq baǵdarlama aıasynda orkestrdiń qalyptasý tarıhyn, onyń ishinde qazaq mýzykasynyń damýynda mańyzdy ról atqarǵan belgili kúıshiler men kompozıtorlardyń dombyralaryn beıneleıtin qundy jádigerlerdiń jyljymaly kórmesi uıymdastyrylady.