Almatyda QR Prezıdenti janyndaǵy Memlekettik basqarý akademıasynyń doktorantýrasy men magıstratýrasyna qujat qabyldaý bastaldy. Óńirlik komýnıkasıalar qyzmetinde ótken pres-konferensıada akademıanyń almatylyq bólimshesiniń dırektory Aınýr Idrısova oqýǵa túserde qandaı qujat qajet ekenin, onyń erejesi men jańalyǵy jóninde aıtyp berdi, dep habarlaıdy aqshamnews.kz
2025 jyly oqýǵa túsetinderdi jańa talap, jańarǵan bilim baǵdarlamalary men sıfrlyq memlekettik basqarýǵa baılanysty jańa baǵyttar kútip tur. Aryz-ótinishti Admission aqparattyq júıesi arqyly bıylǵy 25 maýsymǵa deıin onlaın formatta qabyldaıdy.
«Bıyl magıstratýraǵa 120, doktorantýraǵa 12 memlekettik grant bólindi», - dep habarlady, Aınýr Idrısova.
12 bilim berý baǵdarlamasyna irikteý júrgizilip jatyr qazir. Onyń 9-y magıstrlik («MPA – Memlekettik basqarý», «MPP – memlekettik saıasat»; «MIR – Halyqaralyq qatynas»; «ME – Ekonomıka»; «MRD – Óńirlik damý»; «MHRM – Adam resýrsyn basqarý»; «MDPA – Sıfrlyq memlekettik basqarý»; «EMPA – Modýldik oqytý arqyly memlekettik basqarý»; «MRDm – Modýldik oqytý prınsıpi boıynsha Óńirlik damý») jáne 3 doktorlyq («DPA – Memleketik basqarý»; «DE – Ekonomıka»; «DIR – Halyqaralyq qatynas»).
Sonymen birge, qabyldaý komısıasyndaǵy negizgi ózgerister de aıtyldy.
«Aqparattyq qaýipsizdik pen memlekettik sektordy sıfrlandyrýǵa atsalysatyn sarapshylardy daıarlaıtyn MDPA-nyń «Sıfrlyq memlekettik basqarý» magıstrlik baǵdarlamasynyń ashylýy úlken jańalyq boldy. Osy birjyldyq baǵdarlamaǵa oqýǵa túsý úshin sıfrlyq salada bir jyl jumys istegen tájirıbesi bolýy kerek, al eger osyǵan baılanysty oqý bitirgen bolsa, memlekettik qyzmette joq degende úsh jyldaı jumys istegen tájirıbesi bolýy tıis», - dep túsindirdi Aınýr Idrısova.
Budan bólek, «MPA – memlekettik basqarý» (5 jyl) men «MPP – memlekettik saıasatty» (4 jyl) qospaǵanda, qalǵan barlyq magıstrlyq baǵdarlamalarǵa memlekettik qyzmettegi eńbek ótiline qoıylatyn talap ta ózgergen (3 jylǵa deıin).
Aqyly bólimge túsýdiń sharty da ózgergen. Budan bylaı memlekettik qyzmetkerler de, memlekettik organdardyń mekemesine qarasty uıymdarynyń qyzmetkerleri men kvazımemlekettik sektordyń qyzmetkerleri de aqyly bólimde oqı alatyn boldy. Sonymen birge, irikteýdi jetildire túsý úshin bilim berý baǵdarlamalarynyń árqaısysyna túsetinderge qoıylatyn talap ta naqtylanyp otyr.
Úmitkerler myna qujattardy usynýy kerek:
1. Memlekettik organnyń baǵyty (tek memleketik qyzmetkerlerge arnalǵan). Memlekettik grantqa kandıdat, bastyǵy men apparattyń basshysy qol qoıǵan joldama usynýǵa mindetti.
2. Qujattyń elektrondy kóshirmesin, jeke kýáligin.
3. Joǵarǵy bilimi týraly qujattyń kóshirmesin qosymshasymen birge (magıstratýraǵa túsýge) nemese joǵarý oqy ornyn bitirgen soń bilim alǵany týraly qujattyń kóshirmesin qosymshasymen (doktorantýraǵa túsýge).
4. Sheteldikterdi qospaǵanda, memlekettik tildi V1 deńgeıinen kem bilmeıtinin dáleldeıtin QAZAQ RESMI TEST-ti ne QAZTEST-tiń sertıfıkatyn. QAZAQ RESMI TEST osy akademıanyń bazasynda jasalǵan. Testi kez kelgen ýaqytta, kez kelgen óńirinde turyp onlaın tapsyra beresiz.
5. MPA (Memleketik basqarý), MIR (Halyqaralyq qatynas) baǵdarlamasy men doktorantýranyń baǵdarlamasyna myna (IELTS, TOEFL IBT nemese TOEFL ITP, TOEIC) halyqaralyq sertıfıkattardyń birin tapsyrady.
6. Memlekettik qyzmetkerlerge – qyzmettik jazba, basqa úmitkerlerge – eńbek ótilin kýálandyratyn qujat kerek.
7. Doktorantýraǵa – baǵalanatyn Research proposal (zertteý jumysynyń jobasy).
8. Ótinish (ESP).
İrikteý jumysy eki kezeńnen turady: 28 maýsym men 1 shilde aralyǵynda ótetin Birinshi kezeńde – onlaın-formatta saraptamalyq esse jazylady. Doktorantýraǵa úmitkerler birinshi kezeńde Research proposal baǵalanady. Shildeniń 8-23 aralyǵyndaǵy Ekinshi kezeńde akademıada suqbat ótedi.
Baıqaýdyń aralyq qorytyndysy 25 shilde kúni jarıalanady. Qorytyndy shyqqan soń, talapkerler 7 tamyzǵa deıin qujat tapsyryp úlgerýi kerek. Oqý 1 qyrkúıekte bastalady.
«Akademıada oqýdyń artyqshylyǵyn da aıta ketkimiz keledi. Bul jerde oqýdy praktıkamen ushtastyryp, kásibı turǵyda shyńdalyp, qyzmeti ósedi. Qyzmettegi adammen birdeı stıpendıa alady, shetelge tájirıbe almasýǵa baryp qaıtýy múmkin, ǵylymı zertteý de jasaı alady, jobany qorǵaı alady, jas memlekettik qyzmetkerler Úıinde turyp, tájirıbeli profesorlar men ekspertterden tálim alady», - dep atap ótti Aınýr Idrısova.
Oqýǵa túsýdiń mán-jaıy týraly tolyq aqparatty akademıanyń resmı saıty - apa.kz pen áleýmettik jeliden oqı alasyzdar. Akademıanyń bólimshesi men qabyldaý komısıasynda da qosymsha taǵy túsindiredi talapkerge.