QR Qorǵanys mınıstrligi Tárbıe jáne ıdeologıalyq jumys departamentiniń bastyǵy ádilet polkovnıgi Tileýhan Basqojaev bastaǵan bir top ofıser maıdangerlerdiń úıine bardy.
Uly Otan soǵysynyń ardageri Anatolıı Nazarovıch Popovpen kezdesýde ádilet polkovnıgi Tileýhan Basqojaev maıdangerge Qorǵanys mınıstri general-polkovnık Rýslan Jaqsylyqovtyń quttyqtaý hatyn tabys etti, dep habarlaıdy aqshamnews.kz Qorǵanys mınıstrligine silteme jasap.
Osydan birneshe kún buryn Anatolıı Nazarovıch 99 jasqa tolǵan týǵan kúnin atap ótken bolatyn. Almaty oblysynyń Qaskeleń qalasynda týǵan Anatolıı Nazarovıch áskerı baılanysshy mamandyǵyn alyp, 1943 jyldan bastap Baltyq maıdanynda soǵysty.
Búginde maıdangerdiń keýdesinde II dárejeli Otan soǵysy ordeni men "Rıgany azat etkeni úshin", "Germanıany jeńgeni úshin" medaldary jáne kóptegen mereıtoılyq nagradalar jarqyraıdy.
– Sizdiń býynnyń úlesine tym qatal synaq tústi. Biraq sizder jaýdy jeńip, jeńimpaz atandyńyzdar. Sizdiń erligińiz ben tabandylyǵyńyzdyń arqasynda jer betinde beıbitshilik ornady, – dedi polkovnık T. Basqojaev.
Áskerı qyzmetshiler Uly Otan soǵysynyń ardageri Tamara Maksımovany da quttyqtap bardy.
Tamara Aleksandrovna Maksımova aldaǵy 23 sáýirde 101 jasqa tolady. Soǵys kezinde ol Volokolamsk tas jolyndaǵy gospıtálde jumys istedi. Aldymen tirkeýde, keıin medbıke boldy. Ol aýyr jaralanǵan jaýyngerlerge qamqorlyq jasap, óz betimen hat jaza almaıtyn qyzyl áskerlerge kómektesti. Osy gospıtálde 2007 jylǵa deıin baqytty ǵumyr keshken bolashaq jary Konstantınmen kezdesti.
Tamara Aleksandrovna 1943 jyly aýyr jaraqat saldarynan densaýlyǵyna baılanysty jumystan shyǵaryldy. Soǵystan soń 10-synypty jedeldetilgen baǵdarlamamen bitirip, Máskeý ınstıtýtynyń tarıh jáne fılologıa fakúltetine oqýǵa tústi. Ǵylym kandıdaty dárejesin alyp, ál-Farabı atyndaǵy Qazaq ulttyq ýnıversıtetinde jumys istedi.
Tamara Aleksandrovna II dárejeli Otan soǵysy ordenimen, "Máskeýdi qorǵaǵany úshin" medalimen jáne basqa da nagradalarmen marapattalǵan.
Áskerı vedomstvo ókilderi soǵys ardagerlerine ómirsheńdigi úshin alǵys aıtyp, olarǵa uzaq ǵumyr men amandyq tiledi.