Bıylǵy jyldyń alǵashqy qolóner jármeńkesi ashyq aspan astynda ótedi.
Almatyda demalys kúnderi (25, 26 aqpanda) qolóner jármeńkesi ótedi, dep habarlaıdy almaty-akshamy.kz
Jibek joly dańǵylynyń jaıaý júrginshilerge arnalǵan bóligi kilemder, syrlanǵan ydys-aıaqtar, etnıkalyq stıldegi túrli áshekeıler, kıiz ben jibek kıimder, bylǵarydan jasalǵan buıymdar men qolónerdiń barlyq túrine toly bolady. Qolóner sheberleri óz taýarlaryn elimizdiń ár óńirinen, tipti kórshiles elderden ákelgen.
Almatylyqtar men qala qonaqtary otandyq jáne sheteldik sheberler, qolónershiler men sýretshilerdiń qolynan shyqqan eksklúzıvti buıymdardy tamashalap, satyp ala alady.
«Bul - qolóner jármeńkesiniń 26-shy maýsymy. Munda siz daıyn buıymdardy satyp alyp, jeke tapsyrystar jasaı alasyz, sheberlermen ár buıymnyń jasalý tarıhy týraly sóılese alasyz, onyń qandaı materıaldan jasalǵanyn bilip, oǵan kútim jasaý erejelerin bile alasyz. Jármeńkege qazaqstandyq sheberler, qolónershiler men sýretshiler, sondaı-aq Qyrǵyzstan, Ózbekstan jáne Reseıden kelgen sheberler qatysady», – dedi Almaty qalalyq Qolóner palatasynyń jetekshisi Rımma Nurtaeva.