Qoǵamdyq kólikte urlyq jasady degen kúdikpen buryn sottalǵan azamat ustaldy, dep habarlaıdy Almaty-akshamy.kz
«Kúdiktini bizdiń bólimsheniń arnaıy top músheleri Áýezov aýdandyq PB áriptesteriniń kómegimen qylmys ústinde ustady. Jumys nusqalarynyń birine sáıkes, 44 jastaǵy A.esimdi azamat Almatynyń batys bóliginde, shaǵynaýdandarda urlyq jasap júrgen. Sońǵy jaǵdaıda 67-baǵyttaǵy qoǵamdyq kólikte jolaýshynyń Samsung telefonyn bildirmeı urlap alǵan. Qazirgi ýaqytta tergeý amaldarymen aıǵaqtyq negizde jumys júrgizilip, kúdiktiniń osyǵan uqsas basqa da yqtımal qylmysqa qatysy bar-joǵy tekserilip jatyr. A.esimdi azamat ýaqytsha ustaý ızolátoryna qamaldy», – dedi Almaty qalalyq PD krımınaldyq polısıa basqarmasynyń bastyǵy Qýatbek Naýatov.
Ustalǵan azamat 2020 jyly urlyq jasaǵany úshin sottalǵan. QR QPK-niń 201-babyna sáıkes, tergeý múddesin kózdeıtin ózge de málimetter jarıa etýge jatpaıdy. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.