Jolaýshylar kóligindegi jol-kólik oqıǵalarynyń aldyn alý, sondaı-aq, qoǵamdyq kóliktermen jáne taksılermen jolaýshylardy tasymaldaý talaptarynyń saqtalýyna baqylaýdy kúsheıtý maqsatynda Almaty qalasynda 5-11 jeltoqsan aralyǵynda «Qoǵamdyq kólik» jedel-aldyn alý is-sharasy ótkizilýde, dep habarlaıdy Almaty-akshamy.kz Almaty qalalyq polısıa lepartamentiniń baspasóz qyzmetine silteme jasap.
«Qazirgi ýaqytta bizdiń qyzmetkerler jolaýshylardy tasymaldaýdy júzege asyratyn avtokólik kásiporyndary men jeke kásipkerlerdiń azamattardy tasymaldaý kezindegi qaýipsizdik talaptaryna sáıkestigin tekserip jatyr. Qaladaǵy qoǵamdyq kólikterdiń tehnıkalyq jaǵdaıy men balalardy tasymaldaýmen aınalysatyn júrgizýshilerdiń jol qozǵalysy erejelerin saqtaýyna erekshe nazar aýdarylýda. Sonymen qatar, zańsyz qaıta jabdyqtalǵan qoǵamdyq kólikterdi, sondaı-aq tehnıkalyq jaǵdaıy men konstrýksıasy qozǵalys qaýipsizdiginiń belgilengen talaptaryna sáıkes kelmeıtin qoǵamdyq kólikter men taksı kólikterin paıdalanýǵa tyıym salý sharalary qabyldanatyn bolady. Zańsyz kelimsekter men zańsyz tasymaldaýshylardy anyqtaý maqsatynda kóshi-qon polısıasymen birlesip, tranzıttik kólikterdi tekserý qamtamasyz etiledi. Aldyńǵy sheptegi bólimshelerdiń jeke quramy birneshe ret jáne júıeli túrde quqyqbuzýshylyq jasaǵany úshin izdeýde júrgen adamdar men kólik quraldaryn anyqtaý maqsatynda barlyq tirkeý derekter bazasynda júrgizýshilerdi tekserý uıymdastyryldy», - dedi, ákimshilik polısıa departamentinde.
Polısıada kólikti mas kúıinde basqarý, kólik quralyn júrgizý quqyǵynan aıyrylǵan júrgizýshiniń basqarýy, saqtandyrýy joq adamnyń kólik quralyn basqarýy, qarama-qarsy jolaqqa shyǵý, qıylystar men jaıaý júrginshiler ótkelderin ótý erejelerin buzý, manevr jasaý erejelerin buzý, apattyq jaǵdaı jasaý, uıaly telefondy paıdalaný, kólik quralynyń toqtaý jáne turaqqa qoıý erejelerin buzýy, jolaýshylardy jáne gabarıtti emes júkterdi tasymaldaý erejelerin buzý, sondaı-aq, kólik quralynyń sanatyna sáıkes kelmeıtin gabarıtti emes júkterdi tasymaldaý jáne t.b. derekterin anyqtaýǵa mindetti túrde basa nazar aýdarylatynyn túsindirdi.