Almatyda Qazaqstan halqy Assambleıasynyń 30 jyldyǵyna arnalǵan "Meniń otbasym – tiregim" baıqaýy ótti. İs-sharany qalalyq İshki saıasat basqarmasyna qarasty "Qoǵamdyq kelisim" KMM uıymdastyrdy.
Baıqaýdyń maqsaty — jas otbasylardyń shyǵarmashylyǵyn ashý, ulttyq dástúrdi dáripteý jáne otbasy qundylyǵyn nyǵaıtý. Saıysqa túrli etnostan quralǵan bes otbasy qatysyp, "Beınetanystyrý", "Ulttyq dástúr", "Ónerli otbasy" jáne QHA tarıhyna arnalǵan "Zıatkerlik vıktorına" atty tórt kezeń boıynsha baq synady.
15 jyl otasyp, Alıshý esimdi qyz tárbıelep otyrǵan Rýstam men Ámına Kaıryevter kóne uıǵyr salty — "boshýk toı" (náresteni besikke bóleý) rásimin ótkizdi. Qonaqtardy olar uıǵyr taǵamy – sanzamen qarsy aldy.
"Biz árdaıym bir-birimizdi túsinýge tyrysamyz", — dedi Rýstam Kaıryev.
Baıqaý qorytyndysy boıynsha Kaıryevter otbasy I orynǵa ıe boldy. Ekinshi oryn Orynǵarovtar januıasyna, al úshinshi oryn Danladı áýletine buıyrdy.