Ūlttyq ortalyq muzeıde mádenıet salasynyń úzdígí, suretshí, músínshí, karıkaturashy Qalı Qoralasbaevtyń "Kıelí meken" atty jeke shyǵarmashylyq kórmesíníń ashyluy óttí.
Atalmysh kórme 25 qazan – Respublıka kúníne, Shu audanynyń 95 jyldyǵyna jáne óner ıesíníń 60 jasqa tolǵan mereıtoıyna oraı ūıymdastyryldy.
Jıynda Almaty qalasy Mádenıet basqarmasy basshysynyń orynbasary Arman Halbekov suretshíníń etken eren eńbegín tílge tıek etíp, mereıtoımen qūttyqtady.
Suretshí Qalı Qoralasbaevtyń aıtuynsha, "Kıelí meken" kórmesíníń negízgí maqsaty – Qazaqstannyń beıneleu ónerín damytu, ūlttyq mádenıet pen ruhanı qūndylyqtardy jańǵyrtu, sondaı-aq kórermenge tuǵan jer tarıhynyń kórkem beınesín pash etu. Avtor óz shyǵarmalary arqyly adamnyń tuǵan jerge degen súıíspenshílígín, ruhanı tamyryn jáne ūlttyq bíregeılíktí kórkemdík tílmen jetkízudí maqsat etken.
"Kıelí meken" dep atauyma sebep bolǵan – ata-babamyzdyń qany, analarymyzdyń kóz jasy tamǵan tarıhı jerím. Adam úshín óz tuǵan jeríníń ár būtasy, ár tasy kıelí. Kórmege barlyǵy 150-ge tarta eńbek qoıylǵan. Maıly boyau, akvaerlmen salynǵan suretterden bólek, tas músínderdí de kórermen nazaryna ūsynudy jón kórdím. Ūsynylǵan eńbektíń kóbí 2022–2025 jyldar aralyǵynda jınaqtalǵanymen, arasyna 1990 jyldardaǵy jūmystarymdy da qostym. Endígí armanym – jūrtyna adal qyzmet etetín shákírtter tárbıeleu", – dedí Qalı Qoralasbaev.
Ómírín óner men shákírt tárbıesíne arnaǵan Qalı Qoralasbaev – el mádenıetíne eleulí úles qosyp kele jatqan tūlǵa. Ol kóp jyldar boıy Jambyl oblysy Shu audanyndaǵy "Balalar men jasóspírímder ortalyǵynda" qyzmet atqaryp, bolashaq suretshílerdíń darynyn ashyp, olardyń shyǵarmashylyq ízdenísíne baǵyt-baǵdar beríp keledí. Onyń shákírtterí búgíngí tańda túrlí respublıkalyq, halyqaralyq baıqaularda jeńímpaz atanyp, ūstaz eńbegíníń jemísín pash etude.
Kórmedegí suretter qatarynan tabıǵı tas pen aǵashtan oıylǵan músínder, keskíndeme jáne grafıkalyq jūmystardy bírden ańǵaruǵa bolady. Ár tuyndyda avtor tuǵan eldíń tarıhy men tabıǵatyn, halqymyzdyń salt-dástúrí men qazaq halqynyń ruhanı bolmysyn óner tílímen sheber órnektegen.
Aıta keteıík, Qalı Qoralasbaevtyń eńbekterí elímízdíń jetekshí mádenı oshaqtarynyń qorynda saqtauly. Tabıǵı tastan jasalǵan "Abyz" atty tuyndysy Qazaqstan Respublıkasynyń Ūlttyq muzeıínde, al "Ana – Jer Ana" músíní Á.Qasteev atyndaǵy Ūlttyq óner muzeıínde, "Jeltoqsan jelí – 86" eńbegí Jambyl oblystyq muzeı qoryn tolyqtyrǵan. Būl tuyndylar suretshíníń el ruhanıyatyna qosqan zor úlesíníń aıǵaǵy íspettí.
Suretshí būǵan deıín de respublıka boıynsha bírneshe jeke kórmelerín ótkízgen. Áulıeata jerínde ūıymdastyrylǵan "Táuelsízdík – el tūǵyry", "Aq meken", "Jemqorlyq – jegíqūrt" atty shyǵarmashylyq kórmelerí kórermenníń joǵary baǵasyna ıe bolyp, qoǵamdaǵy ózektí máselelerdí óner tílímen jetkízudíń úlgísí boldy.
Al "Kıelí meken" kórmesí – tek suretshíníń shyǵarmashylyq jetístíkteríníń merekesí emes, tuǵan jerdíń tarıhy men kıesín dárípteıtín, óner men ruhanı qūndylyqty ūshtastyratyn úlken mádenı shara boldy.