Elimizde 2024 jylǵy 22-28 shilde aralyǵynda saýda obektilerinde órt qaýipsizdigin saqtaý boıynsha respýblıkalyq aksıa ótkizildi. Almaty qalasy Tótenshe jaǵdaılar departamentiniń ókilderi óńirlik komýnıkasıalar qyzmeti brıfıńinde aksıanyń qorytyndysyn shyǵardy, dep habarlaıdy aqshamnews.kz
Almaty TJD Memlekettik órt baqylaý basqarmasynyń bastyǵy, azamattyq qorǵaý podpolkovnıgi Konstantın Kanın atap ótkendeı, saýda obektilerindegi órtterdiń negizgi sebebi elektr symdarynyń qysqa tuıyqtalýy bolyp tabylady.
"Aǵymdaǵy jyldyń 7 aıynda Almaty qalasynyń aýmaǵynda 388 órt tirkeldi, onyń 11-i saýda nysandarynda bolǵan. Bul órtterdiń sebepteri: elektr symdary men qurylǵylarynyń qysqa tuıyqtalýy - 10 jaǵdaı, dánekerleý – 1. Nátıjesinde menshik ıelerine de, jalǵa alýshylarǵa da úlken materıaldyq zalal keltirildi, bul tek taýarlyq-materıaldyq emes, sonymen qatar kóptegen otbasylar úshin tabys kózderin joǵaltýǵa ákeldi", – dedi K.Kanın.
Departamenttiń esebinde barlyǵy 14 myńnan astam saýda obektileri bar, olardyń 242-si joǵary jáne ortasha táýekel dárejesine jatady, olar Kásipkerlik Kodekske sáıkes órt qaýipsizdigi salasynda profılaktıkalyq baqylaýǵa jáne qadaǵalaýǵa jatady.
"Aǵymdaǵy jyly 26 saýda nysany profılaktıkalyq baqylaýǵa alyndy, órt qaýipsizdigi talaptarynyń 609 buzýshylyǵy anyqtaldy. Basshylarǵa anyqtalǵan buzýshylyqtardy joıý týraly uıǵarymdar berildi", - dep naqtylady K.Kanın.
Aǵymdaǵy jyldyń sońyna deıin taǵy 30 saýda obektisine profılaktıkalyq baqylaý júrgizý josparlanǵan. Qalǵan obektiler jańa retteý erejelerine baılanysty tekserilýge jatpaıdy.
ÓKQ spıkeri negizinen mynadaı buzýshylyqtarǵa jol beriletinin atap ótti:
- avtomatty órt dabyldarynyń bolmaýy,
- evakýasıa joldarynda janǵysh materıaldardy,
- qaldyqtardy, qaptamalardy saqtaý;
- qolda bar avtomatty órt dabylynyń durys jumys istemeýi,
- alǵashqy órt sóndirý quraldarynyń bolmaýy jáne t. b.
Brıfıńke qatysqan Almaty TJD Memlekettik órt baqylaý basqarmasynyń bas mamany, azamattyq qorǵaý maıory Daryn Muqanov 2024 jylǵy 22-28 shilde aralyǵynda Almaty qalasynda saýda obektilerinde órtterdiń týyndaý qaýpin azaıtý maqsatynda "Qaýipsiz saýda" respýblıkalyq aksıasy ótkizilgenin habarlady, onyń sheńberinde 123 saýda obektilerinde (SOO - 21, SÚ-68, bazarlar - 34) órt qaýipsizdigi salasynda profılaktıkalyq is-sharalar júrgizildi.
Jergilikti atqarýshy organdardyń, "Atameken" UKP ókilderi men eriktiler jumyldyryldy.
35 000-nan astam adamdy qamtı otyryp, saýda oryn ıeleri men jalǵa alýshylarmen 150-ge jýyq kezdesýler, nusqamalar, áńgimeler men túsiniktemeler uıymdastyryldy jáne ótkizildi. Jedel josparlar men órt sóndirý nusqamalary túzetildi.
Sondaı-aq, "Ialán" bazarynda órt-taktıkalyq sabaǵy ótkizildi, onyń maqsaty naqty órt jaǵdaıynda jeke quramnyń is-áreketterin pysyqtaý boldy.
Ol kóptegen nysandarda jańa retteýshi saıasatqa baılanysty órt-tehnıkalyq tekserýler júrgizilmegenin, osylaısha azamattyq qorǵaý organdary tarapynan baqylaýsyz qalatynyn aıtty.
Osyǵan baılanysty, búgingi kúni profılaktıkalyq baqylaýǵa jatpaıtyn saýda obektileriniń basshylarymen órt-tehnıkalyq tekserýdi ózderiniń bastamasymen júrgizý máselesi pysyqtalýda. Bul rette, ákimshilik yqpal etý sharalary qoldanylmaıdy, qorytyndysy boıynsha tıisti usynymdar beriletin bolady.
Sońynda mamandar turǵyndardy órt qaýipsizdigi erejeleriniń talaptaryn saqtaýǵa shaqyrdy.