QazAqparat – Almatyda «I» JSHS men «G» JSHS qarjylyq pıramıdasyn qurý jáne basqarý faktisi boıynsha sotqa deıingi tergeý aıaqtaldy, dep habarlaıdy Almaty-akshamy.kz Inform.kz-ke silteme jasap.
Almaty qalasy Bostandyq aýdanynyń №2 sotynda qarjy pıramıdasyn qurý jáne oǵan jetekshilik etý faktisi boıynsha toǵyz adamǵa qatysty qylmystyq is qaraldy.
«Buryn qylmys jasaǵany úshin sottalǵan Ia. esimdi áıel 2019 jyldyń sáýirinen 2020 jyldyń qarashasy aralyǵynda qarjy pıramıdasyn quryp, ony basqarǵan. Keıin kompanıaǵa jeti adamdy tartyp, olarmen birlesip «I» JSHS jáne «G» JSHS tirkeıdi. Qarjy pıramıdasyn uıymdastyrýshylar azamattarǵa enshiles kompanıalardyń ınvestısıalyq jobalaryna qarajat salýdy usynǵan. Bul kompanıalar syıaqy alýǵa kepildik bergen», - dep habarlady aýdandyq sottyń baspasóz qyzmeti.
Atalǵan pıramıdadan 209 adam zardap shekken. Olarǵa keltirilgen shyǵyn 931 mln 672 myń teńge kóleminde.
«Sot úkimimen qarjy pıramıdasyn qurǵan 8 adam kináli dep tanylyp, 5 jyldan 9,6 jylǵa deıin bas bostandyǵynan aıyrý jazasyna kesildi. Aıyptalýshylardyń birine qatysty Qylmystyq kodekstiń 63-baby qoldanylyp, onyń is-áreketinen zalal bolmaǵandyqtan, shartty túrde sottaldy», - dep atap ótti sottan.
Úkim zańdy kúshine engen joq.