Almatyda 2024 jyly Naýryzbaı aýdanyndaǵy Qarǵaly ózeniniń jaǵalaýyn kórkeıtý jumystary aıaqtaldy. Bul týraly Almaty ákimi Erbolat Dosaev Naýryzbaı aýdany turǵyndarymen kezdesý barysynda habarlady.
Onyń aıtýynsha, joba aıasynda uzyndyǵy 3,5 km bolatyn jaıaý júrginshiler aımaǵy salyndy, balalar jáne sport alańdary ornatyldy, avtosýarý júıesi uıymdastyrylyp, kóshe jaryǵy men kógaldandyrý jumystary júrgizildi.
«Sondaı-aq bıyl maýsym aıynda Qarǵaly ózeni arnasyn 6,7 km qashyqtyqta qaıta jańartý jáne kórkeıtý jumystary bastalady. Joba aıasynda 2026 jyldyń maýsymyna deıin ózen arnasynyń beton qabyrǵalaryn qaıta qurý, sý ótkizý qurylystaryn qalpyna keltirý, kógaldandyrý jáne 10 jaıaý júrginshi kópirin salý josparlanǵan», – dedi qala ákimi.
Buǵan qosa, aýdanda jaıly qalalyq ortany damytý aıasynda «Halyq qatysatyn búdjet» (HQB) baǵdarlamasy iske asyrylýda. 2024 jyly bul baǵdarlama aıasynda jalpy somasy 2,5 mlrd teńgege 40 joba júzege asyryldy.
«Bıyl «Halyq qatysatyn búdjet» aıasynda turǵyndardyń 1 370-ten astam usynysynan iriktelgen 34 jobany iske asyrýǵa 2,5 mlrd teńge bólindi. Sáýir-qyrkúıek aralyǵynda 9 qoǵamdyq keńistikti jáne 6 aýla aýmaǵyn kórkeıtý, 2 avtoturaq aımaǵyn jabdyqtaý, 17 jeke ýchaskeni kógaldandyrý jáne kóriktendirý jumystary josparlanǵan», – dedi Erbolat Dosaev.
Aıta keteıik, «Halyq qatysatyn búdjet» baǵdarlamasy jaıly qalalyq ortany qalyptastyrýdyń tıimdi quralyna aınaldy. Sońǵy úsh jylda Almatyda bul baǵdarlama aıasynda 39,1 mlrd teńgege 938 joba júzege asyryldy. Erbolat Dosaevtyń tapsyrmasy boıynsha 2025 jyly bul maqsatqa 17,1 mlrd teńge bólindi.