İle Alataýy ulttyq saıabaǵynyń aýmaǵynan tabylǵan álsiregen qar barysynyń ómirin saqtaý múmkin bolmady.
Almaty qalalyq zoobaqtyń málimetinshe, 8 jeltoqsan kúni İle Alataýy ulttyq saıabaǵynyń aýmaǵynan álsiregen qar barysy tabylǵan, dep habarlaıdy Almaty-akshamy.kz.
Onyń jaǵdaıy múshkil bolyp, qatty azyp, aryqtaǵan. Ózine jaqyndaǵan tehnıkanyń daýysyna da mán bermegen.
Janýardy kezdestirgen saıabaq qyzmetkerleri dabyl qaǵyp, dereý mamandarǵa habar bergen.
Qar barysy kezdesken aýmaqqa İle Alataýy ulttyq parkiniń mamandary, Zoologıa ınstıtýtynyń qyzmetkerleri, Almaty haıýanattar baǵynyń veterınarlary arnaıy barǵan.
İzdestirý sátti aıaqtalyp, barys saǵat 23:50-de tabyldy.
«Janýardyń jaǵdaıy óte aýyr ekeni belgili boldy. Sol jerde kómek kórsetý múmkin bolmaǵandyqtan, dál dıagnoz qoıý úshin janýardyń denesinen zertteýge qajetti jaǵyndylar (PTR synaǵy úshin) jáne qan synamalary alyndy. Mamandar álsiregen janýardy Almaty zoobaǵyna jetkizý týraly sheshim qabyldady. Ókinishke qaraı, janýardyń jaǵdaıy asa aýyr jaǵdaıda bolǵandyqtan, haıýanattar baǵyna jetkizilgen soń, barys kóz jumdy. Barysqa İle Alataýy ulttyq parki, Zoologıa ınstıtýty jáne Qazaq ulttyq agrarlyq zertteý ýnıversıtetindegi áriptestermen birge patologıalyq-anatomıalyq saraptama jasaldy. Qatty álsirep sharshaýmen qosa, janýardyń asqazanynan kóptegen gelmıntter, polıetılen paketi tabyldy. Jasy ulǵaıǵan barystyń tisteri tozyp, tolyq ań aýlaı almaı qalǵan. Jabaıy tabıǵattyń, Alataýdyń kórki bolyp júrgen barys kóz jumdy. Ony qutqarý úshin qoldan kelgendi jasaýǵa tyrystyq. Biraq bári kesh boldy», - delinedi zoobaqtyń habarlamasynda.
Almaty zoobaǵy osy oqıǵadan sabaq alyp, qorshaǵan ortaǵa, tabıǵatqa qamqorlyq jasaýǵa shaqyrdy.
«Tabıǵat aıasyna shyqqanda, adamdar aınalany lastap, qoqys tastamaýy kerek. Ásirese, túrli taǵamdardyń ıisi sińgen polıetılen paketter janýarlar úshin óte qaýipti. Janýarlarǵa qamqor bolyp, olardy qutqarý – barshamyzdyń mindetimiz ben jaýapkershiligimiz. Biz birlese otyryp tabıǵatty saqtaı alamyz», - dep habarlady zoobaqtan.