Almaty turǵyndary qoldanystaǵy "B. Momyshuly" stansıasynan batysqa qaraı metro baǵytynyń uzartylýymen tanysty.
Bas merdiger "BCN Group" ("Bazis Construction") mańaıda turatyn turǵyndardy shaqyryp, qalanyń eń aýqymdy jobasynyń barysyn óz kózderimen kórýge múmkindik berdi. Qatysýshylarǵa jer ústinde de, jer astynda da júrgizilip jatqan keń kólemdi qurylys jumystary kórsetildi.
Joba aıasynda jalpy uzyndyǵy 3,1 shaqyrym bolatyn eki jerasty tonneli men Abaı dańǵyly men Áshımov kóshesiniń qıylysyndaǵy soltústik-batys betkeıde ornalasatyn "Qalqaman" stansıasyn salý kózdelgen. Tonnelder men stansıanyń tereńdigi – jer betinen 18 metr.
Bas merdiger 1591 metrlik sol jaq tonneldi tolyq qazyp bitirdi. Munda dánekersiz jáne shpalsyz tehnologıamen rels tóseý bastaldy. Bul poıyzdardyń dybysyn azaıtyp, jolaýshylarǵa jaıly qozǵalys jaǵdaıyn qamtamasyz etedi. Sonymen qatar, qozǵalysty avtomattandyrylǵan basqarý, órt sóndirý jáne lańkestikke qarsy qaýipsizdik júıeleri ornatylady.
1593 metrlik oń jaq tonnelde de jumys qarqyndy júrip jatyr, onyń 840 metri búginde qazylyp qoıylǵan.
"Jumys kúrdeli geologıalyq jaǵdaılarǵa beıimdelgen zamanaýı tonnel qazý keshenimen júrgizilýde. Bul keshen dıametri 1,5 metrge deıingi iri valýny bar malta tasty topyraqta qazýǵa múmkindik beredi. Qazý jyldamdyǵy – táýligine 4 metr. Aıyna 115 metrge deıin qazamyz, bul Almaty úshin rekordtyq kórsetkish deýge bolady. Árbir metrden keıin keshen tonnel qabyrǵalaryn temirbeton segmenttermen dereý qaptap otyrady", — dedi mashınıst Amanbek Myrzagulov.
Jer astynda ornalasqan stansıanyń qurylysy da jaqsy qarqynmen júrip jatyr. Stansıa quramyna platforma, eki vestıbúl, úsh kireberis, tehnıkalyq blok pen tómendetkish qosalqy stansıa kiredi. Qurylystyń normatıvtik merzimi – 36 aı, alaıda "BCN Group" ("Bazis Construction") bul jumysty nebári 14 aıda aıaqtaýdy josparlap otyr. Jumys kestesine sáıkes, bıyl qarashada beton jumystary aıaqtalyp, ınjenerlik júıeler men árleý jumystaryna kóshý josparlanýda. Kompanıa stansıa men tonnelderdi ýaqtyly ári qaýipsiz paıdalanýǵa daıyndaý úshin qajetti jabdyqtar men materıaldardy satyp alýǵa kiristi.
Qurylysqa qala turǵyndary, ásirese bolashaq stansıaǵa jaqyn jerde turatyndar úlken qyzyǵýshylyq tanytyp otyr. Olar qurylys alańyn aralap, mamandarǵa suraqtar qoıyp, áserlerimen bólisti. Kópshiligi joba aýqymy men qoldanylyp jatqan zamanaýı tehnologıalarǵa tańdanystaryn bildirdi. Turǵyndar bul stansıanyń ashylýyn asyǵa kútýde, sebebi ol aýdannyń kólik qatynasyn aıtarlyqtaı jaqsartady.
Tonnel qazý qarqyny týraly suraqtarǵa jaýap bergen joba dırektory Murat Ókshebaev sol jaq tonnel aıaqtalǵannan keıin bir keshenniń alynǵanyn aıtty. Qazir oń jaq tonnelde jumys istep jatqan ekinshi keshen kestege saı jumys isteýge tolyq jetkilikti.
Joba boıynsha úsh aýysymmen 400-den astam tájirıbeli maman jumys istep jatyr: 124 qyzmetker jer astynda, al 293-i jer ústi jumystarynda.
Barlyq qurylys-montaj jumysy tapsyrys berýshiniń bekitilgen josparyna sáıkes 2026 jyldyń birinshi jartyjyldyǵynda aıaqtalady dep josparlanýda. Jobany júzege asyrý qalanyń kólik ınfraqurylymy úshin strategıalyq mańyzǵa ıe jáne Almatynyń ondaǵan myń turǵyny úshin kólik qoljetimdiligin aıtarlyqtaı jaqsartady.