Investforým 2013 jyldan beri ótkizilip keledi
Almaty Investment kezekti forýmy qarsańynda Óńirlik komýnıkasıalar qyzmetiniń brıfıńinde uıymdastyrýshylar is-sharada qandaı máseleler talqylanatyny jáne osy jyly qandaı formatta ótetini týraly aıtyp berdi, dep habarlaıdy Almaty-akshamy.kz
Almaty qalasy Kásipkerlik jáne ınvestısıalar basqarmasynyń basshysy Erkebulan Orazalın qalanyń ózekti máselelerin talqylaý úshin osy alańnyń mańyzdylyǵyn atap ótti.
E. Orazalın Almaty Investment – kásipkerlikti damytý men qalanyń ınvestısıalyq tartymdylyǵyn arttyrýdy talqylaýǵa arnalǵan basty ınvestısıalyq forým ekenin eske saldy. Investforým 2013 jyldan beri ótkizilip keledi jáne búkil álemniń memlekettik sektor, bıznes basshylary men ınvestısıalar men ınovasıalar salasyndaǵy jahandyq kóshbasshylardyń kezdesýine arnalǵan eksklúzıvti alań bolyp qala beredi. Bıyl Forým İskerlik keńespen birlesip ekinshi ret uıymdastyryldy.
- Bıyl ınvestforýmda Almaty úshin strategıalyq máseleler – aglomerasıa, ýrbandalý, sıfrlyq transformasıa jáne adamı kapıtaldy ıntegrasıalaý talqylanady, - dep habarlady basqarma basshysy.
Osy forým aıasynda qala ákimderimen «Jańa Jibek joly megaqalalar» telekópiri, qazaqstandyq jáne sheteldik kompanıalardyń sarapshylary men iri ókilderiniń qatysýymen paneldik pikirtalastar, «Jyl jobalary» kórmesi ótedi, onda Almaty qalasynyń aldyńǵy qatarly jobalary men bastamalary usynylady.
Sonymen qatar, bıyl Almatynyń İskerlik keńesi alǵash ret áleýmettik jobalar konkýrsyna bastamashy boldy, onyń qorytyndysy boıynsha úzdikterdi keńes músheleri men qala mesenattary qarjylandyrady.