«Bastamalar men baǵdarlamalardy iske asyrýǵa nazar aýdarý»: Erbolat Dosaev Almaty qalasy boıynsha QHA sesıasyna qatysty, dep habarlaıdy almaty-akshamy.kz
Almaty qalasy boıynsha Qazaqstan halqy Assambleıasynyń XXVI sesıasy respýblıkalyq Dostyq úıinde ótti. İs-shara barysynda Assambleıa qyzmetiniń qorytyndylary shyǵarylyp, aldaǵy kezeńge arnalǵan perspektıvalyq mindetter aıqyndaldy.
Sesıa jumysyna Almaty ákimi, Almaty QHA Tóraǵasy Erbolat Dosaev, ákimniń orynbasary Beıbit Shahanov, QHA músheleri, QHA qoǵamdyq qurylymdarynyń basshylary, Almaty máslıhatynyń tóraǵasy men depýtattary, basqarma basshylary men aýdan ákimderi qatysty.
Qala ákimi Erbolat Dosaev quttyqtaý sóz sóıledi. Megapolıs basshysy osy sesıanyń jumysy Qazaqstan Respýblıkasynyń Prezıdenti – QHA Tóraǵasy Qasym-Jomart Toqaevtyń tapsyrmalaryn iske asyrýǵa baǵyttalatynyn atap ótti.
Ákimniń orynbasary Beıbit Shahanov baıandaǵandaı, 2024 jyldyń basynan beri Assambleıanyń etnomádenı birlestikteriniń qatysýymen jalpy somasy 43 mln.teńgeden astam somaǵa 2 myńnan astam adam men 237 otbasyn qamtıtyn 46 qaıyrymdylyq is-shara ótkizildi.
Ákim orynbasarynyń aıtýynsha, etnomádenı birlestikterdiń eriktileri sý tasqynynan zardap shekkenderge 60 mln.teńgeden astam somaǵa gýmanıtarlyq kómek jınaýǵa jáne jetkizýge belsendi qatysty.
Qatysýshylardyń aldyna Memleket basshysy belgilegen birqatar mindetter qoıyldy-bul Analar keńesi men aqsaqaldar keńesiniń qyzmetin qoldaý tetikterin iske asyrý, QHA-nyń qala ákimdigimen jáne máslıhatymen jumys isteýiniń pármendi tetikterin qurý, memlekettik tildi damytý jáne ony etnostar arasynda qoldanýdy keńeıtý, jastarmen jumys.
«Memleket basshysynyń alǵa qoıǵan mindetterine súıene otyryp, túzetýler engizý, qalalyq Assambleıa qyzmetindegi tásilderdi ózgertý jáne bastamalarymyz ben baǵdarlamalarymyzdy tıimdi iske asyrýǵa nazar aýdarý qajet», - dedi Erbolat Dosaev.
Megapolıs basshysy Qazaqstan halqy Assambleıasynyń jumysyna jańa serpin bere alatynyn, osyǵan baılanysty jas kóshbasshylardy qoldaý qajet ekenin aıtty.
XXVI sesıanyń sońynda megapolıs ákimi Memleket Basshysy qoıǵan mindetterdi tıimdi iske asyrý Assambleıany odan ári damytý úshin qajetti jaǵdaılar jasaýǵa múmkindik beretinin jáne onyń Almatydaǵy qoǵamdyq kelisim men jalpyulttyq birlikti qamtamasyz etýdegi rólin arttyrýǵa yqpal etetinin atap ótti.