Respýblıka saraıynyń aldyndaǵy Abaı alańy úlken ashyq sahnaǵa aınalyp, onda biregeı Open Air gala-konserti «MURA» ótti. Bul is-shara Almaty turǵyndary men qonaqtaryna Qala kúnine, sondaı-aq, Abaı atyndaǵy Qazaq ulttyq opera jáne balet teatrynyń 92-shi maýsymynyń ashylýyna arnalǵan erekshe syı boldy, dep habarlaıdy Aqshamnews.kz tilshisi.
Kórermender álemdik jáne ulttyq klasıkanyń úzdik týyndylaryn, áıgili múzıklder men fılmderden tanymal shyǵarmalardy tyńdady. Sımfonıalyq orkestr, hor, balet jáne teatrdyń jetekshi solıseri zamanaýı sahnalyq sheshimdermen, ınovasıalyq jaryq óner keskindemelerimen jáne fýtýrısik elementteri bar eksklúzıvti kostúmdermen árlengen baǵdarlama usyndy. Ár týyndy jeke bir qoıylym ispetti bolsa, barlyǵy birge birtutas sıqyrly teatr keńistigine aınaldy.
Abaı alańyn tańdaýdyń da ózindik máni bar. Bıyl Abaı Qunanbaevtyń týǵanyna 180 jyl toldy. Teatrǵa uly aqynnyń esimi 1945 jyly berilgen bolatyn. Dál osy Abaı alańynda jınalǵan jurt ónerdiń dástúr men jańashyldyqty toǵystyrǵan zamanaýı tynysyn sezine aldy.
«MURA» gala-konserti «Ǵasyr aldyndaǵy onjyldyq» ataýymen ótetin jańa teatr maýsymyn ashty. Kórermender ónerpazdardy ystyq yqylaspen, erekshe qoshemetpen qarsy aldy. Kópshiliktiń aıtýynsha, Qazaqstanda mundaı aýqymdy open air buryn-sońdy bolmaǵan. «MURA» klasıka men zamanaýı tehnologıany ushtastyrǵan shynaıy mýzyka, bı jáne shabyt merekesi retinde este qaldy.
Abaı atyndaǵy Qazaq ulttyq opera jáne balet teatrynyń dırektory Aınur Kópbasarova ár nómirge arnap arnaıy kostúmder, maskalar men bas kıimder daıyndalǵanyn aıtady. Olar sýretshi Aınur Erimbet pen býtaforlyq jáne quıý sehynyń sheberleri Gúlnár Tabanova men Galına Tashevanyń qolymen jasalǵan.
«Biz almatylyqtarǵa naǵyz sıqyrly shoý syılaýǵa tyrystyq. Teatr artıseri opera jáne balet klasıkasynyń jaýharlarymen qatar áıgili fılmder men múzıklderdiń saýndtrekterin de oryndady. Munyń bári zamanaýı sahnalyq tehnologıalarmen úndestirildi. Qoıylymdy arnaıy shaqyrylǵan ıtalıalyq sýretshi Gaıtano La Mela daıyndady. Jasandy ıntellekttiń kómegimen teatrdyń 1934 jyldan búginge deıingi kórnekti tulǵalarynyń sýretterine jan bitirip, urpaqtar sabaqtastyǵynyń nyshanyna aınaldy. Baǵdarlamany ańyzǵa aınalǵan dırıjer Renat Salavatovtyń Iran-Ǵaıyppen birlesip jazǵan «Qazaqstanym» ánimen túıindedik. Osy konsertti ótkizýge qoldaý bildirgen Almaty qalasy ákimdigine alǵys bildirip, barsha almatylyqty Qala kúni merekesimen quttyqtaımyn!» – dedi Aınur Kópbasarova.