Qala kúnin merekeleý qarsańynda Almatyda kóppáterli turǵyn úılerdiń aýlalarynyń, kóshedegi qoqys jáshikteriniń jáne aryq jelisiniń aýmaǵyndaǵy qoqystardy tazalaý boıynsha aýqymdy jumystar júrgizilip jatyr, dep habarlaıdy aqshamnews.kz
Aýla ishindegi aýmaqtarda qoqys konteınerleriniń tez tolýy jyly kezde iri megapolıstiń ózekti máselesi. «Taza Qazaqstan» baǵdarlamasy aıasynda qalada 700-den astam konteınerlik alańdy sanıtarlyq óńdeý, jýý, zalalsyzdandyrý, 24 747 kóshe jáne aýlanyń qoqys jáshikterin tazartý jumystary júrgiziledi.
Aýla aýmaqtarynyń sanıtarlyq jáne estetıkalyq jaı-kúıin qamtamasyz etý maqsatynda qoldanystaǵy konteınerlik alańdardy jańǵyrtý jáne tereńdetile kómilgen úlgidegi konteınerlerge aýystyrý jumystary jalǵasyp otyr. 2024-2025 jyldary 2 myńnan astam jańa konteıner ornatý josparlanǵan.
Tereńdetile kómilgen tıptegi konteınerlerdiń negizgi artyqshylyǵy, estetıkalyq kórinis, qurylys alańyndaǵy aýdandardyń qysqarýy, jaǵymsyz ıistiń bolmaýy, qustar men buralqy janýarlardyń kirýine tosqaýyl qoıý.
Buǵan qosa, Almaty qalasynyń Ekologıa jáne qorshaǵan orta basqarmasy Almaty qalasynyń polısıa departamentimen birlesip, iri kólemdi qoqystardy shyǵarý bóliginde kóriktendirý erejesin buzýshylardy anyqtaý boıynsha reıdtik is-sharalar júrgizýde. Bir aıdyń ishinde qalada 16 buzýshy anyqtaldy, olarǵa qoldanystaǵy zańnamaǵa sáıkes eskertý men aıyppul jazyldy.
Esterińizge sala keteıik, qala kúni qarsańynda Almatyda Tazalyq aptalyǵy ótip jatyr. 9-13 qyrkúıek aralyǵynda «Almaty – bizdiń ortaq úıimiz» qalalyq naýqany jáne «Taza Qazaqstan» respýblıkalyq baǵdarlamasy aıasynda kóshelerdi jınaý, qalalyq ınfraqurylymdy, aýla aýmaqtaryn, balalar alańdaryn, sýburqaqtardy, ózender men sý aıdyndarynyń jaǵalaýyn, saıabaqtardy, skverler men taý bókterin retke keltirý boıynsha aýqymdy jumys júrgiziledi.