Almatyda 19 qyrkúıekte ótetin Backstreet Boys konsertine daıyndyq qyzý júrip jatyr. Kúzdiń eń iri mádenı oqıǵalarynyń biri bolatyn bul sharaǵa shamamen 27 myń kórermen jınalady dep kútilýde. Osyǵan oraı qala ákiminiń orynbasary Azamat Qaldybekovtiń tóraǵalyǵymen Ortalyq stadıonda arnaıy jıyn ótti.
Jıynǵa polısıa, TJD, jedel járdem, komýnaldyq qyzmet ókilderi, sondaı-aq qala basqarmalary men qurylymdyq bólimshelerdiń jetekshileri qatysty. Kún tártibinde qaýipsizdik, sanıtarıa, logıstıka jáne tehnıkalyq jabdyqtaý máseleleri qaraldy.
Konsert kezinde tártipti qadaǵalaý úshin 2100-den astam polısıa qyzmetkeri, 500 ulttyq gvardıa áskeri jáne 200 kúzetshi jumyldyrylady. İs-shara aldynda kınologtar aýmaqty tekserip, ınjenerlik jelilerdi baqylaýdan ótkizedi. Kórermender metal izdegish ramalar men skanerler arqyly kirgiziledi.
– Abaı dańǵyly ýaqytsha jabylady, kólik keptelisiniń aldyn alý úshin arnaıy «zmeıka» túrindegi týrnıketter qoıylady. Sonymen qatar alypsatarlyq pen zańsyz aksıalarǵa qarsy kúres sharalary kúsheıtiledi, naqty algorıtm daıyn, – dedi ákimniń orynbasary Azamat Qaldybekov.
Ol sonymen qatar medısınalyq jáne órt qaýipsizdigin qamtamasyz etýdi tapsyrdy: stadıonda jedel járdem kólikteri men órt sóndirý brıgadalary kezekshilik etedi, evakýasıalyq jospar ázirlengen. Sanıtarlyq talaptarǵa da basa mán berilip, aýmaqty kún saıyn tazalaý, bıoóńdeý júrgizý jáne sanıtaızerler ornatý mindetteldi.
Jıynda eriktilerdiń jumysyna da arnaıy toqtaldy. Qalalyq jastar saıasaty basqarmasynyń basshysy Azız Qajdenbektiń aıtýynsha, konsertke 150 erikti tartylady. Olar tek 18 jastan asqan jastardan irikteledi, árqaısysyna tegin tamaqtaný talondary beriledi.
Konsertti uıymdastyrýshy First Media Group kompanıasynyń basqarýshy seriktesi AlfıaNurǵumarova aldyńǵy tájirıbege súıene otyryp, jańa sharalar qabyldanǵanyn atap ótti:
– Djennıfer Lopestiń konserti bizge úlken sabaq boldy. Osy joly qaýipsizdik kúsheıtilip, jańashyldyqtar engiziledi. Bıletterdi tekseretin qyzmetkerler sany 100-den 150-ge artty. Stadıon aýmaǵyna qosymsha beınekameralar ornatylyp, alaıaqtyq áreketterdi habarlaý úshin senim telefony iske qosylady, nómiri LED-ekrandarda kórsetiledi. Volonterler sany da kóbeıtildi. Budan bólek, fýd-kort aımaqtary keńeıip, kórermenderge tegin sý taratylady, – dedi ol.
Sondaı-aq, ártisterge barlyq jaǵdaı jasalady: arnaıy grım bólmeleri bar shatyrly qalashyq ornatylady. Meet & Greet jankúıerlermen kezdesý qarastyrylmaǵanymen, stadıon mańynda toptyń resmı merch ónimderi satylatyn úsh dúńgirshek jumys isteıdi.
Almaty mádenı is-sharalardy uıymdastyrýda jańa deńgeıge kóterilýde: qala «A» sanatyndaǵy konsertter ótetin alańǵa aınalyp, olardy ótkizýdiń jańa standarttaryn qalyptastyrýda — basty nazar qaýipsizdikke, kórermenderdiń jaılylyǵyna jáne uıymdastyrý sapasyna aýdarylýda.
Aıta keteıik, Backstreet Boys konserti Almaty kúnine oraı uıymdastyrylyp otyr. Bul mereke jyl saıyn qyrkúıektiń úshinshi jeksenbisinde atalyp ótedi, bıyl ol 21 qyrkúıekke sáıkes keledi.