Almatyda 1979 jylǵy qubyrdy aýystyrý úshin Aımanov kóshesiniń ýchaskesimen júrý demalys kúnderi shekteledi, - dep habarlaıdy Aqshamnews.kz tilshisi «Almaty jylý júıesi» JSHS-ne silteme jasap.
Aldaǵy jylytý maýsymyna daıyndyq aıasynda josparly jylý júıelerin jańǵyrtý jumystary júrgizilýde. Bul jumystar aıasynda 1979 jyly paıdalanýǵa berilgen jylý magıstraliniń qubyrlary jańasyna aýystyrylady.
Osyǵan baılanysty 2025 jyly 2 tamyz saǵat 06:00-den bastap 4 tamyz saǵat 06:00-ge deıin Aımanov kóshesiniń Qarasaı batyr jáne Bógenbaı batyr kósheleri arasyndaǵy bóligi eki baǵytta da avtokólik qozǵalysyna ýaqytsha jabylady.
Mundaı shekteýler jol bóligindegi qubyr jelisin qaıta jańǵyrtý jumystaryn qaýipsiz júrgizý maqsatynda engizilip otyr. Rekonstrýksıa kezinde tutynýshylarǵa ystyq sý berý toqtatylmaıdy.
Jalpy, bıyl qala boıynsha 39 shaqyrym jylý jelisin jańǵyrtý josparlanǵan. Bul eski jelilerdiń tozý deńgeıin 54%-ǵa deıin tómendetýge múmkindik beredi.
Aıta keteıik, jol qozǵalysyna qatysty barlyq shekteý men ózgeris týraly málimetter Almaty.kz saıtynda, @AlmatyJoly Telegram-arnasynda, aýdan ákimdikteri men basqarmalardyń áleýmettik jelilerinde, sondaı-aq, «2GIS» jáne «Iandeks kartalar» servısterinde jarıalanǵan.