Jyldam ári sapaly qyzmet kórsetý.
Júıeli reforma jáne polısıa jumysynyń servıstik modelin engizý aıasynda Memleket basshysy Almaty qalasynyń barlyq aýdandarynda servıstik ortalyqtardy ashýdy tapsyrdy. İshki ister mınıstri Marat Ahmetjanov pen qala ákimi Erbolat Dosaev polısıa departamentinde qoǵam belsendilerimen servıstik ortalyqtardy ashý boıynsha jobany talqylady, dep habarlaıdy Almaty-akshamy.kz İİM baspasóz qyzmetine silteme jasap.
«Memleket basshysy júktegen mindet – HHİ ǵasyrdaǵy adamǵa baǵdarlanǵan polısıa. Onyń ólshemi – halyqtyń senimi. Halyq sengen kezde tyǵyz baılanysta bolady, sonda ol polısıa jumysynyń tıimdiligin kóre alady. Jalpy, jobany biz «servıstik model» dep ataımyz. Búgingi mindet – jyldam ári sapaly qyzmet kórsetý», - dedi Marat Ahmetjanov.
Sondaı-aq vedomstvo basshysy «Servıstik ortalyqtardyń maqsatty aýdıtorıasy kim bolady?» degen suraqqa jaýap berip, ózara árekettesýdiń naqty qurylymyn qurý jáne fýnksıalardyń qaıtalanýyna jol bermeý qajettigin atap ótti.
Stasıonarlyq polısıa ǵımarattarynda barlyq negizgi qyzmetter shoǵyrlanǵany aıtyldy. Sonymen birge bul ǵımarattardyń rejımdik túrde bolatyny umyt qalmady. Olarǵa qoljetimdilik shekteýli. Buryn front-keńseler ashylǵan edi, biraq olar polısıanyń qabyldaý bólimderi men anyqtamalyq búrolarǵa aınaldy, onda adamdardyń naqty problemalary sheshilmeýi múmkin.
Sondyqtan ártúrli aýdıtorıaǵa polısıa qyzmetin kórsetýdiń úsh deńgeıli modelin qurý usynylady. Birinshisi – jolaýshylar nemese ótkinshi adamdar. Olar úshin qoǵamdyq oryndaryndaǵy modýldik beketter jumys isteıdi. Ekinshisi – ýchaskelik polısıa pýnktterine júginetin aýdan (aýmaq) turǵyndary. Úshinshisi – ákimshilik jáne qylmystyq ister boıynsha sheshimdermen kelispegen adamdar, quqyq buzýshylar, qyzmet alýshylar.
Azamattardyń ótinishterin qarastyrý ǵana mańyzdy emes. Olar quqyqtyq tártip máselelerin jan-jaqty taldaýdyń negizderiniń biri bolýy kerek. Bul saladaǵy profılaktıka tek polısıa qyzmetimen shektelmeıdi. Ol úshin polısıanyń servıstik ortalyqtary janynan ártúrli vedomstvolardyń quqyq qorǵaýshylarynan, ákimdikter qyzmetkerlerinen jáne qoǵam belsendilerinen turatyn qaýipsizdikti qamtamasyz etýdiń vedomstvoaralyq toptary qurylady.
Qaýipsizdik máselelerin sheshý mınıstrlikter kabınetterinde emes, jergilikti jerlerde júzege asyrylady. Buǵan jurtshylyq tikeleı qatysady. Bul «problemaǵa baǵyttalǵan tásil» dep atalady.
Sonymen qatar kezdesýde qalada beınebaqylaý júıelerin damytý jáne jeke júıelerdi biryńǵaı dıspecherlik pýnktke ıntegrasıalaý talqylandy.