«Polısıanyń servıstik ortalyqtary» jobasyn iske asyrý tetigi men ádisterin Almaty ákimi Erbolat Dosaev, İİM basshysy Marat Ahmetjanov, ishki ister mınıstrliginiń jáne qalalyq polısıa departamentiniń ókilderi talqylady.
Servıstik modeldiń negizgi qaǵıdaty – halyqpen tyǵyz baılanys. Bul modeldi sátti engizý úshin «bir tereze» qaǵıdaty boıynsha jumys isteıtin servıstik ortalyqtar, modýldik beketter jáne ýchaskelik polısıa pýnktteri syndy jańa ınfraqurylym qajet, dep habarlaıdy Almaty-akshamy.kz.
Almaty ákimdiginiń «Qaýipsiz qala» jobalyq keńsesiniń jumysy aıasynda iske asyrylatyn servıstik ortalyqtardy qurý azamattar kómek surap, júgingen kezdegi shıelenis pen yńǵaısyzdyq deńgeıin tómendetýge, qalalyq polısıa bólimshesiniń jumysyn jeńildetýge, quqyq qorǵaý organdary jumysynyń tıimdiligin arttyrýǵa múmkindik beredi. Polısıanyń servıstik ortalyqtarynda 55 túrli tegin qyzmet, onyń ishinde kóshi-qon, ákimshilik zańnama jáne t.b. quqyqtyq máseleler boıynsha keńes beriledi. Ári ol jerde psıholog, medıator bolady. Servıstik ortalyqtarda resepshn, kútý aımaǵy, balalar buryshy qarastyrylǵan.
Halyqtyń shaǵymyna jedel den qoıý men qaýipsizdik jónindegi aldyn alý sharalarynyń tıimdiligin arttyrý maqsatynda 2026 jylǵa deıin «Qadamdyq qoljetimdilik» qaǵıdaty boıynsha 30 zamanaýı jabdyqtalǵan ýchaskelik polısıa pýnktteri ashylady. Bul polıseıler úshin de, ótinish berýshiler men azamattar úshin de qabyldaý ýaqytynda qolaıly jaǵdaı jasaýǵa jol ashady.
«Polısıanyń servıstik ortalyqtary – quqyq qorǵaý organdarynyń qoǵammen ózara is-qımylynyń ońtaıly nusqasy. Kelýshiler úshin qolaıly jaǵdaı jasalady. Qoǵamdyq oryndarda polısıanyń mobıldi pýnktterin ornatýǵa jáne jaraqtandyrýǵa qala búdjetten qosymsha qarajat bólýge daıyn. Biz jergilikti búdjet esebinen ortaq paıdalanylatyn jerlerde polısıa úshin jaqsy modýldik pýnktter jasaýǵa daıynbyz. Komýnıkasıa júrgizemiz, ǵımarattardy tolyǵymen jabdyqtaımyz – bul yńǵaıly bolady», - dedi Erbolat Dosaev.
Jańa tásildi iske asyrý aıasynda Almatyda polısıa jumysyna sıfrlandyrý men jańa tehnologıalardy engizý belsendi júrip jatyr. Qalada 16 myńnan astam beınebaqylaý kamerasy biryńǵaı monıtorıń júıesine qosylǵan. Operatorlar zań buzýshylyqtardy tirkeýge jáne qaskúnemniń jeke basyn anyqtaýǵa múmkindik alady. Qalada qaýipsizdik júıesin jetildirý úshin materıaldyq-tehnıkalyq baza únemi jańartylyp otyrady. Tásildi ózgertý aıasynda jańa tehnologıalyq sheshimder usynylady.
Qazaqstan Prezıdentiniń tapsyrmasy aıasynda iske asyrylyp jatqan «Polısıanyń servıstik modeli» jobasyn talqylaý barysynda keńeske qatysýshylar sheteldik tájirıbege júgindi. Shotlandıa, Grýzıa, AQSH pen Ulybrıtanıada quqyq qorǵaý organdarynyń jumys isteý mehanızmderi taldandy, servıstik model, osyndaı baǵdarlamany engizý nátıjesi zertteldi, statısıka saralandy. Joǵaryda atalǵan elderdiń quqyq qorǵaý organdarynyń málimetterinshe, qalada qylmys sany aıtarlyqtaı azaıǵan.