Almatyda birneshe urlyqqa qatysy bar kúdikti ustaldy, – dep habarlaıdy aqshamnews.kz Polisia.kz-ke silteme jasap.
Kúndizgi ýaqytta polısıaǵa Tóle bı dańǵyly boıyndaǵy úılerdiń biriniń aýlasynda turǵan mopedtiń urlanǵany týraly habarlama kelip tústi. Belgili bolǵandaı, motosıkl dýlyǵasyn kıgen belgisiz eki adam ońtaıly sátti paıdalanyp, urlyq jasaǵan. Oqıǵa ornyna dereý jedel tergeý toby jetti.
Jaqyn mańdaǵy aýmaqty jedel tekserý barysynda Almaly aýdandyq PB-ǵa qarasty polısıa bóliminiń jedel ýákili Eldar Toqtashev sıpattamalary uqsas kúdiktilerdi baıqady. Jolda kólik kóp bolǵandyqtan, polısıa qyzmetkeri kúdiktilerdi jaıaý ańdı bastady. Birneshe ret toqtaýdy talap etkenine qaramastan, kúdiktilerdiń biri qashýǵa árekettenip, saldarynan polısıa qyzmetkerin birneshe metrge súırep, basqa jol qozǵalysyna qatysýshymen soqtyǵysqan. Alǵan jaraqatyna qaramastan, polısıa qyzmetkeri batyldyq tanytyp, kúdiktini ustady. Keıinnen onyń qaladaǵy moped urlyǵynyń kem degende tórt epızodyna qatysy bar ekendigi belgili boldy.
- Eldar Toqtashevtyń batyl áreketi qoǵamdyq qaýipsizdikke qater tóndiretin kúdiktini ustaýǵa múmkindik berdi. Biz óz qyzmetkerlerimizben maqtanamyz, olar Zań men tártip jaı ǵana sóz emes, azamattar úshin naǵyz qalqan ekenin kún saıyn dáleldeýde, - dedi Almaly aýdandyq PB-ǵa qarasty polısıa bóliminiń bastyǵy Tımýr Imanbekov.
Kúdiktige qatysty sotqa deıingi tergeý amaldary júrgizilýde. Ol qamaýǵa alyndy. Polısıa qyzmetkerleri kúdiktiniń osyǵan uqsas basqa da qylmysqa qatysy bar-joǵyn tekserip jatyr.